PRES. GARCIA - Usa ka menor-de-edad nga babaye ang gilugos sa usa ka 20 anyos nga ulitawo niadtong Hunyo 15, 2015 pasado alas 8:00 sa gabiI sa may ngilit nga bahin sa Purok 4, Barangay Canmangao, Pres. Garcia, Bohol.
Ang suspek mao si Capistrano Boiser, trabahante sa barko nga mv San Isidro 7, ug molupyo sa Purok 6, Barangay Canmangao, sa naasoy nga lungsod.
Sa pakisusi sa kapolisan sa lungsod, nasayran nga ang 14 anyos nga biktima gisugo sa inahan pagpalit og sud-an sa tindahan diin adunay mga grupo sa mga lalake ang nag-inom.
Dihang padulong na unta mopauli ang biktima, kalit lang siya giatangan sa suspek ug gisampungan ang baba niini dayon gidala sa hilit nga lugar diin didto gipahimuslan ang pagka babaye niini.
Nakadagan ang biktima dihang nitindog ang suspek human sa paglugos niya.
Si Boiser nasikop dayon sa mga pulis ug gibalhog sa prisuhan ug karon nag-atubang na og kaso.