ORMOC CITY - Humanon sa Department of Public Works and Highways (DPWH) 4th Engineering District sa Leyte ang pagpalapad sa national road ning dakbayan karong Agusto 15.
Matod ni DPWH 4th LED Engineer Lino Gonzales nga halos 100 porsiyento nang nahuman ang pagpalapad sa karsada sa Barangay Valencia.
Apan sa kinapusoran sa siyudad, nalangan ang ilang trabaho tungod sa mga hangyo sa pipila ka mga panimalay ug establisemento.
“On going ang ato project, na slow down lang ta sa portion sa city proper because niining naapektuhan nga establisemento, kay we have also to consider the request of the owners kay di man sab ta diretso diretso og guba,” matod ni Gonzales.
Siya niangkon nga problema sab nila sa ubang bahin sa siyudad ang road right of way apan, iyang giklaro nga ipatuman nila ang balaud nga way estraktura nga itukod sud sa 10 metros gikan sa sentro.
“Dugay nana nga national road ug imo tan-awon ang naka-encroach diha sa RRW kana ilang extension, so ang original nila wa gyod molapas, so sa una nga wa pa mo lapas kahibawo na sila nga that lot is owned by the government,” dugang ni Gonzales.
Giangkon ni Gonzales nga daghan silag kaso karon nga giatubang tungod sa problema sa RRW.
Siya niabiso sa mga kontraktor nga adlaw ug gabii ang pagtrabaho sa maong proyekto
“Sige tag dokdok ana atong mga kontraktor nga to finish as early as possible labi na sa city proper kay kasabot ta nga magka-traffic gyod labi nag peak hour,” dugang ni Gonzales.