CHAIRMAN sa Committee on Environment sa konseho sa dakbayan sa Talisay, Konsehal Jojo Bacalatos, nibutyag nga kalimtan  na lang  ang pagpadeklarar  og state of calamity sa upat ka mga barangay karon nga nagsugod na ang ting-uwan.

Una niini, si Mayor Johnny delos Reyes nirekomendar nga ipadeklarar og state of calamity ang upat ka mga bukirang barangay human nagnihit na ang tubig.

Apan ang konseho nagdumili sa pagdeklarar human nga napakyas ang city disaster sa pagduso og mga dukomento aron pagsuporta sa maong tinguha gawas pa, gibutyag sa konseho nga dili water tanker ang gusto sa mga tawo sa bukid kon dili hose sa tubig.

Karong bag-o, si Bacaltos niingon nga kalimtan na lang kini tungod sa pagbalik sa tubig sa bukid tungod sa pag-uwan ug wala pa usab masumiter ang gikina­hanglang dokumento.