PADALHAN sa Commission on Human Rights (CHR) 7 ang St. Anthony Mother & Child Hospital og request letter isip tabang sa ginikanan ni Harry Morgan Visaya, ang walo ka buwan nga bata nga namatay sa giingon nga kapabayaan sa maong tambalanan aron makuha nila ang dokumento nga ilang gipangayo.

Kagahapon pormal na nga nibisita ang inahan sa bata nga si Marifhe Ylaya ug ang amahan sa bata nga si Haryl Visaya sa buhatan sa CHR 7 aron mangayo og tabang.

Matod ni Ylaya nga gipasabot ra hinuon sila sa maong buhatan sa mga proseso sa pagabuhaton niini ingon man kon unsa nga tabang ang madalit niini.

Plano na usab nila nga mopasaka og pormal nga reklamo ngadto sa Professional Regulation Commission aron ireklamo ang mga doktor nga nalambigit sa pagpabaya nga niresulta sa kamatayon sa iyang anak.

Si Leo Reyes Villarino ang special investigator III sa CHR 7 nibutyag sa tigbalita nga dili una sila mopahigayon og imbestigasyon ug huwaton nila ang resulta sa nga im­bestigasyon sa Department of Health (DOH) 7.

Dugang ni Villarino nga makisusi usa siya sa unsa ang pwede nga lakang nga ilang mabuhat ineg dawat nila sa resulta sa maong imbestigasyon.

“We will not presume to be experts in this field,” dason niya.