ITRATAR og tarong ug iparehistro sa mga tag-iya ang ilang binuhi nga iro, awhag sa pangulo sa Department of Veterinary Medicines and Fisheries sa dakbayan sa Sugbo nga si Dr. Pilar Romero.
“Treat your animals as part of your family,” si Romero niingon ning nahinabi sa Sun.Star Superbalita kagahapong adlawa.
Matod ni Romero nga ubay-ubay usab ang stray dogs kun saag nga mga iro dinhi sa dakbayan apan maglisod sila pagsuta sa tukma nga gidaghanon niini.
Apan base sa gipahigayon nga libreng bakuna sa DVMF sa barangay sa Busay niadtong miaging semana, nagkadaghan ang bag-o nga iro.
Sa 127 ka mga iro nga ilang gibakunahan, 20 lang niini ang gipaubos sa re-vaccination kun pagpabakuna pagbalik ug ang laing gatus mga bag-o na.
Base sa datus sa World Society for the Protection of Animals nga sa matag usa ka babaye nga iro ug mga anak niini makahimo kini paghimugso og 67,000 ka mga itoy sulod sa unom ka mga tuig o kapin sa 10,000 matag tuig.
Hangyo ni Romero alang sa nanag-iya sa iro nga ipa-spay kun ipa-neuter ang ilang iro aron dili kini makamugna og daghan pa nga iro.
Sa datus sa DVMF niadtong tuig 2014, 583 ka mga babayeng iro ang gipatang-tangan sa iyang amo og matris samtang 407 ka iro ang ilang natala niadtong tuig 2013.
Samtang 643 ka mga iro ang ilang gipakapon sa tuig 2014 ug 335 lang kini niadtong tuig 2013.
Nagpamatuod kini nga mas daghan na ang nanag-iya og iro nga nagpakabana kabahin niining nagkasaka nga populasyon sa iro.