“I’M appealing to the shipping company to put this an end.”
Kini mao ang hangyo ni Santa Fe Mayor Jose Esgana bahin sa isyu nga ang mga barko nga magbiyahian gikan sa pantalan sa Hagnaya paingon sa ilang lungsod kay giingong naglabay og hugaw sa tawo sa kadagatan.
Ang mayor nagkanayon nga wa lang sila magkasinabtanay tali sa mga kompaniya sa barko nga magbiyahian sa ilang lungsod.
Matod niya kon nahibawo pa siya o kon nakadawat pa siya sa Ship Sanitation Control Exemption Certificates nga giisyu sa Bureau of Quarantine nga pinetsahan og Enero 16, 2015, Abril 6, 2015 ug Abril 20, 2015 di na unta sila mopahigayon og inspection niadtong Mayo 29 ning tuiga sa pipila ka mga barko sa Island Shipping Corp.
Si Esgana nagpatawag og press conference sa niaging gabii sa Cebu Country Club.
Ang Municipal Environment and Natural Resources Office sa Santa Fe sa report niadtong Nobiyembre 2014 nitaho nga upat ka mga barko sa sa ISC nga nidunggo sa pantalan sa lungsod kay way mga septic tank nga maoy gimando sa Port and Airport Sanitation and Environment Code of the Philippines.
Apan mismo si Esgana niangkon nga ang Menro igo lang nihinabi sa mga tripolante sa mga barko niadtong higayona ug wa kini igong kahanas ug dili sangkap sa igong kagamitan sa pagpahigayon og inspeksyon.
Ang lokal nga kagamhanan sa Santa Fe naalarma human pipila ka mga molupyo ug turista ang nitaho nga dunay nanglutaw nga mga hugaw sa tawo sa kadagatan ug kabaybayonan sa lungsod.