MOKABAT sa P500,000 nga shabu, mga armas ug granada ang nasakmit gikan sa usa ka grupo sa mga gikatahapang durugista sa usa ka buy- bust operation nga gihimo sa City Anti- Illegal Drug Special Operations Task Group (CAIDSOTG) sa Locatha, Brgy. Looc, dakbayan sa Lapu-Lapu niadtong Huwebes mga alas 5:30 sa hapon.
Sa operasyon, walo ka mga suspek ang nasikop, lakip na niini ang gituohang leader sa grupo nga si George P. Maranga III, 32, ug ang ka- live in niini nga maoy nagsilbing secretary sa ilang mga operasyon nga si Gerlie Mae S.Gerolaga, 23, parehong lumolupyo sa maong dapit.
Ang ubang mga suspek giila nga sila si Lord Azur S. Potot, 22 anyos, Efren B. Dalion, 42 anyos, minyo, Marklie L. Rosellosa, 22 anyos, Harold Steve B. Miral, 21, taga Purok Orchids sa maong barangay; James B. Lombre, 28, taga Brgy. Canjulao, ug Robert Amancio, 38, taga Brgy. Canjulao sa dakbayan.
Matod sa hepe sa CAIDSOTG nga si PSI Verniño B. Noserale nga ang grupo kanunay nga mopahigayon og illigal nga transakyon di lang sa Brgy. Looc, lakip na sa mga silingang barangay sama sa Gun- ob.