GIKATAKDANG molarga karong adlawa ang no.1 cyclist sa Sugbo nga si Niño Surban paingon sa Italy alang sa 2015 UCI Mountain Bike Marathon World Championships nga ipahigayon karong Hunyo 27 sa Selva Val Gardena, Medal Plaza.
Si Surban, kinsa magrepresentar sa Team Specialized PH, naka-qualify sa world tournament human niya naangkon ang ika-11 nga dapit sa UCI MTB Marathon Series sa Langkawi, Malaysia/
Sa interbyu sa Sun.Star Cebu, igsuong buhatan ning mantalaan, gipasabot ni Surban, 27, nga iya nang pangandoy nga makaapil sa MTB World Championship gikan pa lang sa iyang pagsugod ning maong klase sa paugnat sa kusog.
Bisan mao pa lang kini ang labing unang higayon ni Surban nga makaapil siya sa world stage, gipasalig ni Surban nga buhaton niya ang tanan niyang makaya aron makaparang sa labing kuyaw nga mountainbikers sa tibuok kalibutan.
Nagkanayon si Surban maayo ang dagan sa iyang preparasyon apan wala lang niya nasunod ang tanan nga naa sa iyang programa kay nagluyaw siya ning semanaha.
Matod ni Surban nga kapin sa 80 ka riders gikan sa nagkalainlaing nasod ang magsangka sa lumba lakip na niini ang defending champion nga si Jaroslav Kulhavy sa Czech Republic.