DI makapakita og aksyon si light welterweight Jason Pagara sa umaabot nga Pinoy Pride fight card sa Dubai karong Agusto 7 apan gikataho nga posibling makaaway kini sa usa ka dakong promotion didto sa US sa uwahing bahin ning tuiga.
Sa sayo pa, si Pagara gikatakda unta nga moaway sa Dubai uban sa iyang manghod na si Prince Albert Pagara sa double main event fight.
Apan sa uwahing kalambuan, si Michael Aldeguer, president sa Ala Promotions, mibutyag nga imbis si Jason Pagara, sila na si AJ “Bazooka” Banal, ang two-time world challenger, ug ang beteranong si Jimrex Jaca maoy magsilbing supporting bouts ni Prince Albert Pagara sa Dubai card.
Ikasangka ni Jaca sa maong promotions mao ang Mexican knockout artist nga si Pablo Lugo Montiel kinsa adunay 21 ka daog, 17 ka knockouts, ug lima ka pildi. Si Montiel ang kanhi WBO Mexican lightweight title holder human niya ma-knockout sa ikasiyam nga round si Noe Morales niadtong July 24, 2010. Sa 2011 iyang gi-knockout si Jonas Olivas sa 1st round apan napildi kini ni Pablo Cesar Cano sa 7th round sa ABA-NABA Mexico lightweight championships niadtong Hunyo 25, 2011.
Napaundang usab niya sulod sa third round si Jesus Camacho sa tuig 2014.
Samtang ang 32 anyos nga Jaca naghupot og 39-8-4 nga baraha ug may 22 ka knockouts. Apan niadtong Marso 16 ning tuiga, gi knockout siya ni Akihiro Kondo sa Tokyo sa ikaupat nga round.