PORMAL nga abrihon karong Biyernes, Hulyo 14, ang bagong edisyon nga Misamis Oriental Kuyamis Basketball and Volleyball Inter-municipality Sportsfest sa Don Gregorio Pelaez Sports Center.
Mismo si Gobernador Yevgeny Emano ang moabli sa mga dula karong alas-dos sa hapon.
Mohatag si Emano sa iyang mensahe ug mangulo sa pag-abli sa basketball game agi sa ceremonial toss.
Unhan ang basketball game pagbangi tali sa Initao ug Villanueva sa 18-under boys.
Niaging season, naangkon sa Tagoloan ang titulo sa open ug 14-under agi pagpilde nila sa Claveria Cowboys ug Opol Dolphins, sunod-sunod.
Ang Misamis Oriental Basketball Referees and Officials Association nga gipangulohan ni Danilo Jaminal maoy magdumala sa officiating table, samtang si Prexy Elipe mao ang magdumala sa tanan dula.
Madungan sab ang pag-abli sa dula tali sa Manticao ug Libertad alang sa men’s volleyball.