MAGSAYSAY, Davao del Sur -- Gipailawom na sa state of calamity ang Barangay Bacungan sa lungsod human mimugna og dakong danyos ang nahitabong pagbaha niadtong Sabado sa gabii, Hulyo 8.
Gibutyag ni Barangay Kapitan Raul Sanchez nga gihinabi sa SunStar SuperBalita nga 40 ka mga pamilya ang nabahaan diin usa ka balay ang naanod samtang laing upat ka pamilya ang naguba ang balay.
Mihangyo si Sanchez sa iyang mga molupyo nga mo-aguwanta una samtang gidali pa pag-ayo ang nahugmak nga kalsada hinungdan nga temporaryong di maagian sa mga motorista.
Nasuta nga usa ka buhawi ang mikusokuso sa lugar nianang pagka-alas 5 sa hapon mao nga kalit midako ang tubig ug miawas ang sapa sa Sitio Asbangilok.
Gilayong nakigtagbo si Mayor Arthur Davin sa Municipal Disaster Risk Reduction and Management Council (MDRRMC) ug mga kapitan sa 22 ka mga barangay niadtong Miyerkules sa hapon.
Usa mga gihisgutan ang himuong ayuda sa Barangay Bacungan ug pagpangandam sa mga posibleng kalamidad samtang gisaulog ang National Disaster Resilience Month karong buwana.
Matud ni Davin nga angayang andam kanunay ang mga opisyal sa barangay sa takna nga mahitabo ang mga pagdahili sa yuta ug pagbaha ilabi na nga kanunay'ng nagdaut ang panahon.
Si Joseph Penonia, MDRRMC action officer, nagsulti nga mobalor sa P850,000 ang danyos sa kalamidad apan ila pang sutaon ang agrikultura sanglit mga imprastrakrura pa lang ang unang nasubay.
Gihikay na sab sa MDRRMC ang paghimo og relief operations alang sa mga biktima.
Hinuon, way kinabuhing nakalas ug naangol dihang nakabakwit gilayon ang mga molupyo sa luwas nga lugar, apan naanod ang ilang mga gamit.
Kini na ang ika-tulong higayon nga nakasinati og kusog nga pagbaha ang lungsod.
Niadtong 2006, daghang kabalayan ang naanod sa Bulatucan River ug nasundan pa niadtong 2011.
Nagpahimangno na ang mga awtoridad sa publiko nga mangandam kanunay samtang apektado ang rehiyon sa Intertropical Convergence Zone. (Orlando B. Dinoy)