GUMIKAN sa mga kakulian, wala gilakip sa defending champions University of the Visayas (UV) Green Lancers sila si Gileant Delator ug Melvin Butohan sa ilang gipasa nga line-up sa Cebu Schools Athletic Foundation Inc. kagahapon atol sa deadline.
Sila si Delator ug Butohan parehong gikan sa University of Cebu (UC) Webmasters nga nagtinguhang makabalhin sa Green Lancers.
Matod ni Green Lancers assistant coach Van Halen Parmis nga ninghatag na unta og transcript of records ang UC nila ni Delator ug Botuhan apan wala kini release papers gikan sa bag-ong coach sa Webmasters nga si Raul “Yayoy” Alcoseba.
“Ninghatag na man unta og TOR ang UC pero wala man mohatag og release papers si coach Yayoy. Kami sa UV, maghuwat lang mi nga ma-clear na gyud sila,” asoy ni Parmis.
Gipasabot ni Parmis nga si Delator segurado untang maapil sa ilang puwersa karong tuiga kon gibuhian pa kini ni Alcoseba.
Sa interbyu sa laing pamantalaan, nagkanayon si Alcoseba nga mismong sila si Delator ug Butohan ang naghimo og problema dihang mibiya kini sa Webmasters nga wala mananghid.
Matod ni Cesafi deputy commissioner Danny Duran nga ang screening sa tanang mga line-up ipahigayon karong Lunes.
Sa laing bahin, ang opisina ni commissioner Felix Tiukinhoy Jr. nagpadala na sa media og kompletong skedyul sa tanang mga duwa 2017 season.
Sa labing unang adlaw sa torneyo karong Agusto 5, gilaumang mahimong sentro sa atraskyon si Alcoseba gumikan kay ikaharong sa Webmasters ang iyang kanhi gigiyahan nga mao ang Southwestern University (SWU) Cobras sa main game alang sa college division sa Cebu Coliseum.
Ang panagsangka sa Cobras ug Webmasters maoy mosunod sa engkuwentro sa ilang mga manghod nga Baby Cobras ug Baby Webmasters sa high school division.
Ning tuiga, ang torneyo mosunod sa double-round robin format sa elimination round alang sa college division.
Ang mopatigbabaw nga upat human niini mao ang makasulod sa semi-finals diin ang top-two teams maggunit og twice-to-beat nga bintaha. Ang panagparang sa semis mao ang tali sa No. team batok No.4 ug No.2 batok No.3.
Ang modaog sa semis magsangka sa best-of-three championship series samtang ang mapilde magkombati og knockout game sa inilugay sa ikatulong dapit.
Ang high school division mosunod sa single-round robin alang sa elimination round.
Ang format sa semis hangtod na sa finals sa high school pareho ra sa college.