MALAMPUSON ang gipahigayong 1st Davao City-Wide Earthquake and Tsunami Drill diin tanang mga establisyemento sa dakbayan sa Davao ang misalmot sa "Shake Out! drill" alas 9 sa buntag niadtong Biyernes.
Nasulayan ug nasaksihan sa mga Dabawenyo ang mga senaryo ugaling moabot ang linog ug ang posibleng aftershock niini ug ang pag-abot sa tsunami.
Tanang tawo sa mga establisyemento misalmot diin sagad mga estudyante ug mga magtutudlo sa mga nagkadaiyang tunghaan sa dakbayan.
Gitudlo ang duck, cover, ug hold on, dayon mo-evacuate sa lugar nga posibleng mahulugan og mga debris gikan sa mga miliki nga gambalay.
Nasinati sab ang gihimong secondary evacuation ugaling mohapak ang tsunami.
Ang Crocodile Park sa Diversion Road sa Barangay Maa, Davao City ang nahimong lugar nga kaadtoan sa mga tawo ugaling dunay nagpakita nga pagtaas sa lebel sa tubig sa dagat pipila ka minuto human ang pagtay-og.
Sumala ni Jefry Tupas, head sa City Information Office, nga andam ang mga kahimanan sa Central 911 sa Public Safety and Security Command Center sa pag-rescue sa mga biktima ugaling matigayon ang linog.
Sa nakalabay nga semana ang Davao City maoy gihimong pilot sa natigayong Nationwide Earthquake Drill sa nasud. (Jeepy Compio)