Oro, MisOr mibira og medalya

NAKAULI ang pambato sa Cagayan de Oro ug Misamis Oriental og mga medalya sa bag-o lang nahuman nga 2015 Asean Age Group Chess Championships nga gipahigayon didto sa Singapore.

Sa iyang unang pagrepresentar sa nasod sa Asean, nibira ang 6-anyos nga Kagay-anon nga si Ruelle “Tawing” Canino og upat ka silver ug usa ka bronze nga medalya sa 8-under girls nga mga event.

Garbo sa San Nicolas, Barangay Kauswagan, nakuha ni Canino ang usa ka silver sa individual rapid event samtang ang tulo ka silver gikan sa team event sa standard, rapid ug blitz.

Si Canino, usa ka grade one nga tinun-an sa Kauswagan Elementary School, ang nangulo sa mga team events tungod sa hitaas niyang mga iskor.

Ang usa niya nga bronze nakuha gikan sa blitz event individual event.

“Gitabangan ra ba ni siya sa mga taga-Vietnam pero nibawi sab siya sa uban events,” matod sa amahan nga si Ruel Canino sa paguli sa delegasyon niadtong Huwebes. “Pero nakurat sab ang taga-Vietnam kaniya kay napilde tong usa sa ilang kusog.”

Iyang igsoon nga si Ronald, nga nidula sa iyang ikalima nga sunod-sunod nga higayon sa Asean, nibingwit og tulo ka bronze gikan sa team event sa 12-under boys.

Sila si Mary Joy Tan ug Me Ann Baclayon sa Misamis Oriental nakabingwit og silver sa tulo ka team event sa 12-under girls. Gawas niana, nidaug sab og bronze si Tan og bronze sa rapid.