ABI gyud nako og mga statesman kining mga sakop sa oposisyon diha sa Konseho sa Syudad sa Sugbo. Apan nasayop ko. Ilang gibabagan ang gitakdang reorganization sa mga tsirman sa mga komitiba.
Hinuon, mahimo sab nga nakigbisog lang sila sa ilang katungod basi sa sayop nga pagtuo.
Ilang pagtuo nga na-apil man sa pag-ihap sa quorum ang bise mayor, apil sab siya sa pag-ihap sa mayoriya inig panahon sa pagboto.
Apan, bisan asa pa nga botohan, ang presiding officer makaboto lang kon mobuak og table.
Karon, kay di na man tabla ang pagboto sa mga konsehal diha sa Konseho, di na mahitabo ang pagka tabla sa boto labi na kon reorganization ang hisgutan.
Kulang na man og usa ka boto ang oposisyon nga konsehal. Ang bise mayor angayan lang untang mo-preside sa session.
Di man ko abogado, apan basic man kaayo nga ang presiding officer angayang mobotar lang kon magtabla ang pagboto.
Bisan pa man, nahitabo nga gituyo sa pag-usab sa oposisyon kini aron lang mababagan ang katuyoan sa mayor alang sa syudad.
Dayon, ingnon dayon nga way nahimo ang mayor samtang sila nalipay kay malampusong nakababag.
Ang ako lang ba, kalayo pa unta sa piliay. 2017 pa man gud. Duha ka tuig pa ang piliay sa 2019. Bisan man og mamulitika, di lang unta pang-tuison ang mga balaod aron lang makababag.
Wa nganli
Nagubot karon sa social media sama sa mga sakop sa Maghisgot Kitag Politika Bay tungod kay wala nganli sa mga balita kon si kinsa kining abogado nga broadcaster nga nalambigit sa gireklamong paglugos sa usa ka 13 anyos nga babaye.
Alang kanako, nag-amping lang batok sa kasong libel ang mga mantalaan kay wala pa may kasong nasang-at.
Di sab hisgutan sa media ang ngalan sa biktima sa ingon niining kaso.
Apan, wa lang tingale makabantay ang mga reporter, nitingog na man gud ang maong broadcaster diha sa iyang Facebook ug nanghangyo sa mga amigo ug amiga nga hatagan siyag higayon nga makatubag sa kaso nga, matod pa, di tinuod.
Basi sa balaod, presumed innocent ang maong abogado nga broadcaster.
Makasabot ko sa giisang isyu sa pipila ka Netizens kay duna man sab gyuy mga sakop sa media nga dali kaayong mohisgot sa ngalan sa mga suspek bisan og wala pay kaso nga nasang-at.
Angayan kining hinuktokan sa atong mga kauban sa media kay ang publiko gusto sab nga makiangayon kita sa pagsibya ug pagmantala. Bati sab nga pasagdan kining pipila ka Netizen nga masuko sa Bombo Radyo nga wa na man sa estasyon ang maong broadcaster.
(@anol_cebu sa Twitter)