MIBAHAD ang 4th Infantry Division Philippine Army (4ID-PA) sa mga lumad nga bag-o lang miuli sa Sitio Camansi, Barangay Banglay, lungsod sa Lagonglong, Misamis Oriental.

Si Colonel Patrick Martinez, kinsa tigpamaba sa 4ID, niingon nga nakurat siya sa mga pamahayag sa tigpamaba sa mga lumad kalabot sa ilang nakalot nga bukog nga gipanag-iyahan sa usa ka NPA.

Matud ni Martinez nga nalipay pa gani ang mga pamilya sa biktima nga nahatagan kini og pormal nga lubong human sa pagkakaluti, unya daw ang tigpamaba sa mga lumad nga mao si Charito Acosta namahayag nga ilang pabayron ang mga sundalo sa damyos sa ilang pagkalot niini.

Mibahad usab si Martinez nga pasakaan kini og kasong libel tungod sa mga pamahayag niini nga gipanghasi sila sa mga sundalo didto sa ilang lugar tungod kay nasuta bag-ohay lang sa fact-finding committee sa probinsya sa Misamis Oriental nga walay pagpanghasi nga nahitabo.

Dugang ni Martinez nga wala siya nakasabot nganong ingon ana ang kasuko niini sa mga sundalo nga igo lang miprotehir kanila sa dapit.

Sa pagkakaron, wala nay presensyasa mga sundalo sa dapit ug ang mga namakwit nga mokabat 250 ka individwal ang nahibalik na niaging adlaw.

Kahinumduman, halos duha ka semana ang mga lumad nga mipuyo sa Capitol Ground tungod sa giingong pagpanghasi sa mga sundalo. (SVB)