TUBOD, Lanao del Norte -- Naaresto dili pa lamang dugay ang ina-ina nga giingong milapwa sa 4 anyos nga bata ning lungsod niadtong niaging tuig.

Nag-atubang sa kaso nga pagpatay si Beth Manigos Andoy, 35, minyo, ug ang igsuon niini nga si Pablito Cabuenas Manigos, 33, ulitawo, pulos taga Barangay Malingao sa maong lungsod.

Kahinumduman nga nalapwahan og nagbukal nga tubig ang tiyan sa biktima nga anak sa bana ni Andoy, kinsa atua sa kauluhan manarbaho dihang nahitabo ang maong insidente.

Lakip nga naluto sa pagkalapnos ang pribadong bahin sa lawas sa bata.

Gani nahimo pang "viral" sa usa ka social networking site ang hulagway sa bata nga patay na lakip na ang hulagway sa maong ina-ina nga napuno sa pagkondena.

Matud ni Police Inspector Dennis P. Tano, hepe sa Tubod Municipal Police Station, nga miingon ang mga silingan nga si Andoy ang misabwag og nagbukal nga init-tubig sa bata apan giangkon kini sa igsuon nga si Manigos.

Miingon si Tano nga sa ilang imbestigasyon, midangat og duha ka semana nga nag-antus ang bata sa paso nga miabot ngadto sa "second degree burn" nga wala gidala sa tambalanan ayha kini namatay.

Apan sa interview sa Sun.Star SuperBalita, gilimod kini sa suspek. "It's not true... walo ka adlaw lang," matud sa suspek.

Giangkon niini nga sayop ang wala nila pagdala sa bata sa ospital apan gitambalan nila kini og ointment. Wala usab nila kini dayun gipahibalo ngadto sa amahan hangtud nga kini namatay.

"Nagdepensa ko sa akong igsoon, nagdepensa pud ko sa akong bana kay dili stable ang iyang trabaho. Makadungog ko nga 'one day, one eat' lang siya didto sa Manila," matud pa ni Andoy.

Sa iyang bahin, hugtanong gibarugan ni Junjun nga siya ang nakalapwa og nagbukal nga tubig sa bata apan wala niya kini, matud pa, gituyo.

Hilabihan, matud pa, ka-badlungon ang bata nga kanunay magdagan-dagan bisan kanunay kini gibadlong.

Sa pagsulat ning balita, ang duha ka mga suspek nakabilanggo sa Provincial Jail sa Lanao del Norte.