ANAA sa 200 ka stakeholders ang gilaumang mosalmot sa Sports Tourism Forum 2017 karong Hulyo 25 sa Grand Men Seng Hotel.
Si Cindy Cruz sa Sports Development Division sa City Mayor's Office nagyagyag niini niadtong Huwebes atol sa Davao Sportswriters Association Forum sa NCCC Mall Davao B3 Family Room.
"Participants are those from different sports associations, tourism sector like hotels and resorts, schools, local government units, civic and professional clubs and transportation companies, among others," sigon ni Cruz.
Lakip sa mga mutambong sa opening ceremonies silang Department of Tourism (DOT) Secretary Wanda Teo, Philippine Sports Commission Chairman William Ramirez ug Davao City Mayor Sara Duterte-Carpio diin himuon sab ang paglusad sa 2nd Sports Tourism Awards.
Si DOT regional director Robby Alabado maghisgut sa "Dynamics of Sports Tourism." Samtang si Princess Galura, Sunrise Events Incorporated general manager, maghisgut sa "Managing a Sports Event" ug si Philippine Rugby Football Union director of development Matthew Cullen maghisgut sa "The Rise of Rugby Football Through Sports Tourism".
Ubang topiko nga hisgutan mao ang "Case Study: Hobie Challenge sa Philippine Inter-Island Sailing Federation"; "Is Davao Ready for Sports Tourism?" ni SDD-CMO officer-in-charge Mikey Aportadera; ug "Role of Media in Promoting Sports Tourism" ni Fox Networks Group Philippines general manager Jude Turcuato.
Ang registration fee anaa sa P1,500 apil ang paniudot, duha ka snacks ug forum kit lakip na sertipiko.