GITIONAN ni alyas Resbak og kutsilyo ang usa ka menor de edad, hinungdan nga malampusong nakuha ang mahalong cellphone samtang sakay sa dyip niadtong milabay nga adlaw sa Rizal-Gaerlan Streets ning siyudad sa Cagayan de Oro.

Nagpatala ang inahan sa biktima nga si Guen (bansagon gipugngan), 42, kauban sa anak niini nga usa ka 13 anyos kinsa pulos nanimuyo sa Macasandig ning siyudad.

Subay sa report sa Police Station 1 (PS1) sa Divisoria, nasayran nga naila sa biktima ang suspetsado pinaagi sa gallery nga mao si Noel Abbari, alyas Resbak.

Giingong samtang nag-inusarang sakay ang biktima sa PUJ liner gikan sa Xavier H.S Pueblo de Oro, mitapad kaniya ang maong suspetsado. Paghidangat na sa nahisgutang dapit, kalit kining gipakitaan sa kutsilyo ug miingon nga “cellphone lang ang ako bay, e-apil pud imo pitaka” ug mikanaog kini diha sa may Agustin-Tiano Streets.

Gumikan sa kahadlok, wala na mopalag pa ang menor de edad nga biktima, hinungdan nga malampusong nadala niini ang iPhone 4S nga cellphone nga nagkantidad og P40 mil ug pitaka nga adunay sulod nga 1,000 Yen (P360). (KCS)