NAIPIT ang usa ka driver hinungdan sa iyang kamatayon dihang natigayon ang bangga niadtong nilabay'ng adlaw sa Musuan Highway, Dologon, lungsod sa Maramag, Bukidnon.

Atubangan sa sementeryo sa Musuan nahitabo ang dugoun nga aksidente nga gilangkuban sa tulo ka mga sakyanan diin usa ka JIANG-SU Utility Vehicle nga gimaneho ni Florante Pesiao 49, taga P-4 Poblacion Manticao, Misamis Oriental.

Laing usa ka Hino Truck nga kargado sa produkto sa Nestle gimaneho ni Nelson Paigang, taga probinsya sa Camiguin, uban sa helper nga si Eduard Cabilis sa lungsod sa Talisayan, Misamis Oriental ug usa ka Isuzu truck nga gimaneho ni Benjamin Ludivise sa Eastern Wao, Lanao del Sur ug helper nga mao si Ivon Niño Perez, 24, taga Banga, South Cotabato.

Sa imbestigasyon nga gihimo sa Maramag Police Station, nasuta nga ang sakyanan nga Jiang Su ang miagi sa dalan sa Maramag gikan niadtong tungora sa siyudad sa Valencia.

Apan paghidangat sa dapit, labina kay kurbada, kalit nga mi-overtake ang hino truck ug tungod sa kusog nga dagan, nawad-an kini og kontrol, hinungdan ang likod nga bahin niini misangko ug mipasok sa atubangan nga bahin sa isuzu truck nga sakyanan nga miagi sa pikas nga dalan.

Pulos samad ug bun-og ang naangkon sa mga driver ug helper apan ang driver sa isuzu nga truck nga mao si Ludivise ang deretsong nakabsan sa kinabuhi human naipit sa driver seat nga bahin ug nakaangkon og grabeng samad sa kalawasan.

Ang mga biktima pulos gipangdala sa balay tambalanan sa dapit kinsa padayon pa nga giobserbahan sa mga doktor samtang ang kaso padayon pa nga giimbestigahan ni PO1 Reggie Sevilla sa Maramag Police Station.