MOKABAT ngadto sa P200 mil ang nadala sa gituohang budol-budol gang gikan sa usa ka retirado nga magtutudlo samtang anaa kini sa Rizal-Chavez Street ning siyudad sa Cagayan de Oro.

Nagpatala sa kapolisan ang anak nga si Kenneth Robert Cabrera, 36, ulitawo ug nanimuyo sa A. Velez Street ning siyudad, alang sa amahan niini nga si Agustin Cabrera, 83.

Subay sa report sa Police Station 1 (PS1) sa Divisoria nga magpadala unta ang biktima og sulat alang sa iyang anak sa Cagayan de Oro City Post Office apan kalit nga niabot ang usa ka wala maila nga lalaki kinsa gituohang aduna pa kini kauban.

Giduol ang maong suspetsado ug nagpakiluoy kini ngadto sa biktima nga maghulam og kwarta tungod kay aduna kini ipagawas nga mga kemikals nga anaa sa Port Area apan dili kini ma-release.

Giingong gihangyo ug gikumbense kini sa suspek nga mag-withdraw og P200 mil gikan sa BDO ATM niini.

Human maka-withdraw, misakay kini sa sakyanan sa maong mga suspetsado ug gihatag matud pa niini ang maong kantidad sa paghidangat na sa Corrales Streets ning siyudad kalit nga gibiyaan ang maong biktima.

Sa pagsulat niini nga balita, padayon pa sa pagpahigayon og operasiyon ang tinugyanan sa kapolisan.