APROBADO na ang P12 nga usbaw sa suholan nga gikatakdang ipatuman karong Hulyo 3 ning tuig basi sa bag-ong minimum wage rates sa Northern Mindanao nga gipagawas gikan sa Regional Tripartite Wage Productivity Board (RTWPB).
Niadtong Huwebes kini gipagawas sa mantalaan ug mo-epekto 15 ka adlaw human sa publikasyon nga mao ang Hulyo 3.
Apan ang Union Congress of the Philippines (ALU-TUCP) Northern Mindanao misupak sa naaprobahan nga usbaw.
Gibutyag ni Nick Borja, kinsa regional vice president sa ALU-TUCP Northern Mindanao, nga P89 ang una nilang gisugyot nga suholan apan P12 lamang ang giaprobahan dayag nga dili paigo sa mga panginahanglanon sa mga mamumuo.
Gipasabot ni Borja nga samtang magpabiling taas kaayo ang presyo sa mga palaliliton, kamahal sa tuition, kamahal sa kuryente, tubig ug uban pa dili gyod moigo ang maong usbaw nga suholan.
Apan tungod kay aprobado na kini sa RTWPB, ma-implementar na kini sa dili madugay ug wala na silay mahimo niini.
Daw paningkamotan na usab nila nga mangayo og laing dugang usbaw nga suholan.
Samtang si Alma Asilo, usa ka trabahante, niingon nga nalipay siya nga madugangan ang suholan gikan sa minimum nga P306 mahimo na kining P318.
"Bahalag gamay basta naay nadugang," butyag niini sa Sun.Star SuperBalita.
Hinuon, gipasalig ni Oro Chamber President Engr. Cerael Donggay nga maimplementar kini ug imando ngadto sa mga establismento nga ipatuman ang bag-ong usbaw basi sa gipagawas nga mando sa RTPWB.
Hinuon, ang usbaw nga suholan adunay klasipikasyon o kategorya sama sa agriculture ug non-agriculture.