DIGOS CITY -- Dakong tabang alang sa Philippine National Red Cross ang ubay-ubay ka mga dugo nga nakolekta atol sa gipahigayong “Sandugoan” niadtong Biyernes, Hulyo 14.
Gipasalamatan sab ni Mayor Joseph Peñas ang mga midonar og dugo nga gipangunahan nila ni Sultan Baguio Saripada, City General Services Officer, City Legal Officer nga si Abogado Gary Taghoy, Engineer Alexander Ypil, ug Thea Diamante Salon and Spa.
Ang programa giulohan og Sandugoan, Imong Tabang Kinabuhi sa Uban, gipahigayon sud sa Sangguniang Panlungsod sa dakbayan.
Hugtanong misuporta sa maong kalihukan sila si Konsehal Michael Latasa, Rey Ayo, Eddie Cadilig, Melot Garcia ug Mila Llanos, kinsa nalipay sa pagtubag sa panawagan nga mo-donar og dugo.
Matud ni Bise-mayor Rey Hermosisima nga kabahin sa pagsaulog sa Padigosan 2017 ang maong aktibidades ug gisayo lamang kini tungod kay dili kini masakto sa duha ka adlaw nga selebrasyon.
Dungan niini, makigtigom sab ang mayor sa kapulisan sa dakbayan aron pahugtan ang seguridad sa kasaulogan diin gihandum ang pagkamugna sa Digos nga lungsod niadtong Hulyo 19.
Gidason ni Peñas nga sa maong adlaw hatagan nila og dakong bili ang mga Lumad kinsa maoy nagbunyag sa unang ngalan nga Padigosan una nahimong Digos kaniadto, nga buot ipasabot mao ang pagkaligo. (OBD)