HUNYO 25, 2005 ang dili makalimtan nga petsa ni Alejandro Booc Abaño. Kini ang adlaw dihang nagungaw sa kamatayon ang konsehal sa barangay ug nahitabo ang dako nga milagro sa iyang kinabuhi.
Unom ka samad pinusilan sa kalibre .45 ang iyang nahiagoman human pusila sa tawo nga iyang giminaayo og tratar, duha sa iyang wala nga batiis, tulo sa tiyan ug usa sa bukobuko.
Ang hugot nga kampanya ni Alejandro batok sa gidili nga drugas ang ilang gituohan nga motibo sa pagpamusil.
Alas 8 sa gabii sa maong adlaw, nahitabo ang krimen. Si Alejandro, kapitan niadtong higayona sa Barangay Jaguliao, lungsod sa Getafe, gipusil tungod mismo sa ilang kapilya ug sa butangan sa ilang karo.
“Sorry, Kap, binayran ra man gud mi,” pamulong sa gunman kang Alejandro human kini pusila, nga giasoy niini sa Superbalita Cebu. Ang kauban nga lalake sa mamumuno nagsige og mandar nga tiwasan og pusil si Alejandro aron mamatay.
Apan ang magasin sa armas sa gunman natagak hinungdan nakahigayon og layog ang konsehal.
Nakabunot og laing magasin ang suspek ug napusilan si Alejandro sa iyang bukobuko, kansang bala nilatay sa iyang panit ug naungot.
Human sa pagpamusil, si Alejandro gitabang sa mga barangay tanod.
Taliwa sa unos ug kamabawo sa tubig sa dagat, nilawig si Enriquita, 61, asawa ni Alejandro kauban ang ilang anak nga si Niñolito, 37; ug mga tanod paingon sa Barangay Santa Rosa, dakbayan sa Lapu-Lapu diin dunay gamay nga tambalanan.
Nameligro na ang kinabuhi ni Alejandro niadtong tungora, kansang mga ngabil nagkurog samtang gibukotan og trapal.
Apan samtang luwan sa panagatan, nahitabo ang katingalahan nga butang.
Usa ka alindanaw nga may kolor gold ang nag-luksolukso sa mga mata ni Alejandro ug dunay gipasirit nga halang ngadto sa iyang mga mata.
Si Enriquita niasoy nga gimilagrohan sa Señor Santo Niño ang iyang bana kay wa mag-bleeding ang mga samad pinusilan.
Gikan sa Santa Rosa, si Alejandro gidala sa Sitio Angasil, Barangay Mactan, diin dunay nagpaabot nga ambulansya sa Emergency Rescue Unit Foundation nga maoy nagdala niini sa Chong Hua Hospital.
Ang kanhi kapitan gipaubos sa operasyon aron pagkuha sa mga bala. Diha na nahibaw-an nga duna pay laing bala ang naungot sa iyang panit sa iyang bukobuko.
Human sa duha ka adlaw, nakamata si Alejandro apan ni-collapse ang iyang kidney ug nisaka ang iyang sugar hinungdan nga gipaubos na usab kini sa laing operasyon. Sud sa usa ka tuig kini nabaldado human sa hitabo.
Si Alejandro nagtuo nga dako nga milagro ang nahitabo sa iyang kinabuhi.
“Ang tawo mamatay ra man gyud kon kabubut-on sa Ginuo. Pero nagtuo ko nga naa gyud ko mission dinhi sa kalibotan,” pamulong sa 61-anyos nga konsehal, kinsa hugot nakigbatok sa gidili nga drugas.
Siya naningkamot nga mahimo nga modelo ang ilang barangay sa ubang mga barangay nga usa ka drug free ug nagpatuman og mga programa sama sa paghatag og libre nga tambal ug pagpaospital sa mga kabos, paghatag og lungon sa mga mamatyan ug pagpatukod og balay sa mga uyamot sa ilang yuta nga way abang.
“I will make and initiate my own government. My own government nga wa sa atong gobiyerno,” dugang ni Alejandro.