USA siya sa bag-ong itsura sa Biyaheng DO30, ang local public affairs program nga giprodyus sa City Information Office (CIO) sa Davao City ug gi-ere via GMA Davao.
Siya si Glenn Arthur Bangonon, o mas nailhang Percy ngadto sa mga higala niya.
Bag-ong gradwar lamang sa kursong Mass Communication sa Ateneo de Davao University, aminado si Percy nga wa niya damha nga makasud siya sa CIO ug mahataga'g break isip usa sa segment host sa Byaheng DO30.
"First day sa work, murag na-culture shock ko," tsika niya. "Kanang murag naga-adapt pa ko kay first work nako siya, then gina-learn sab nako ang culture diri kay lahi man gyud ang naa na ka sa trabaho, compared sa organization lang sa school."
Una pa man misabak sa pag-segment host, trabaho ni Percy ang paggama og newsletter, pag-atiman sa updates ug uban pa alang sa social media accounts sa dakbayan sa Davao.
Hangtud nga gi-offer kaniya ang trabaho nga mahimong segment host sa programa, butang nga gipangulbaan siya at first.
"Gipa-try ko mag-host, though sa college gihimo namo na, pero hesitant gihapon ko kay lahi ra siya from school works diba. Nakulbaan ko kay di ko anad, usa pa hilumon ko nga tao. Pero I try for a change, so far okay man diay siya, nakaya nako, naa gyud perme ang learning process," tsika sa 20-anyos nga lumad from General Santos City, nga nangandoy sab mahimong Flight Attendant.
Si Percy ang in-charge sa Byaheng DO30 Assignment diin nagahatag siya og katin-awan sa pipila ka mga pangutana nga wala pa kaayo matubag.
"Like nahimo nako sa segment ang proper way sa pag-pronounce sa Kadayawan. So nag-interview ta og expert nga motabang nga mahatag ang sakto gyud nga pagsulti ani," niya, diin usa sa target nila ang mga milleneals nga ma-appreciate pa og maayo ang history ug ubang importanteng hisgutanan labot Davao City.
Human mahatag kaniya ang trabaho, angkon ni Percy nga mas na-appreciate niya ang Davao City ug ang mga serbisyo niini.
"Lahi ra gyud kay sa student pako wa koy pakialam. Lalo na taga Gensan ko, diri lang ko nag-eskwela. Sa school di kaayo ko active. Pero karon nga part ka na sa team, ma-realize nimo nga maka-happy nga maka-share ka og dugang learnings para sa uban. Maka-explore ug maka-meet kag lain-lain nga tao sa imong trabaho. Nakat-on nako pag-embrace ang public service ug unsa gyud ang mga services nga ginahatag sa city sa mga constituents niini."
Ang Byaheng Do30 maghisgut sa 30 mga major programs ug proyekto ilawom sa 10 key priorities sa Davao City Government.
Kini ang pagkunhod sa kapobrehon, imprastraktura, solid waste management, panglawas, edukasyon, agrikultura, turismo, transportation planning and traffic management, peace and order ug disaster risk reduction and mitigation.
Luyo niini, dugang mga pagtulun-an sab kalabot kinatibuk-an sa Davao City ang ginapaambit sa mga hosts sa programa.
Atangi ang biyahe sa Byaheng Do30 matag Dominggo sa GMA Davao, alas 8 a.m. ngadto 9 a.m.