USA ka online food delivery service company ang nag-expand sa ilang serbisyo dinhi sa Davao City, diin plano nilang sugdan ang ilang operasyon Mayo ning tuig.
Sa nakalabay nga Huwebes, Abril 19, gihimo ang pormal nga pagpa-ila-ila sa Foodpanda, sa usa ka press conference sa Mesa restaurant sa SM Lanang Premier.
Gibutyag ni foodpanda public relations ug partnership manager Rey Rubio nga nakita nila ang dakong potensiyal sa food delivery business dinhi sa dakbayan.
Sa kasamtangan 40 ka restawrant dinhi sa dakbayan ang ka-partner sa Foodpanda, sama na lamang sa mga local restos nga Rekado, Cucina Ilocana, The Fatboy’s Kitchen, Yolks, Kookels, Yellowfin ug daghan pa.
Apan gidugang ni Rubio nga daghan pa sila og duolon nga mga partner resto alang sa mas halapad nilang serbisyo ngadto sa mga Dabawenyos.
Ang Foodpanda una nga nailhan sa Manila ug Cebu.
Ang foodpanda usa ka dakong kompanya nga may sobra 27,000 ka partner restaurants sa sobra 190 ka dakbayan sa 12 ka Asian ug Central Europe countries.
Gipanag-iyahan kini sa Delivery Hero nga worldwide leader sa food delivery industry.
Sa mga magpadeliver may delivery charge nga 59 pesos.
Samtang sa ilang pagsugod dinhi karong Mayo, kinsa mang mopadeliver, libre ang unang delivery, mogamit lamang sa code nga PANDAVAO.
Unsaon pag-avail? I-download lamang ang app sa Playstore ug i-follow lamang ang mga instructions nga nakabutang. (Ubang balita gikan ni Ace June Rell S. Perez)