HUMAN makadawat og reklamo ang Department of Labor and Employment (Dole) 7 kabahin sa usa ka trabahante nga nakuryentihan sa gitrabaho nga warehouse sa dan Lopez Jaena, Subangdaku, dakbayan sa Mandaue.
Mao kini ang rason nga naisyuhan og work stoppage order ang proyekto niadtong Lunes.
Dali nga nagpadala ang DOLE 7 og labor laws compliance officer (LLCO) aron mohimo og Occupational Safety and Health Investigation (OSHI).
Matod ni Dole 7 Regional Director Elias Cayanong nga usa ka mason ang trabahante nga nakuryentihan.
Matod ni Cayanong nga ang transmission line duol sa dapita nga iplaster unta walay insulation. Ang metal frame niigo sa tension wire ug nakuryentihan ang trabahante.
Kakuwang sa safety gear
Dugang niya nga ang insidente nagpakita nga di istrikto ang management sa pagpatuman sa safety ug health standards sa worksite diin delikado sa mga nagtrabaho niini.
Atol sa OSHI wa makapakita ang tigdumala sa proyekto sa aprobado sa DOLE nga Construction Safety and Health Program (CSHP); Philippine Contractors Accreditation Board (PCAB) license registration; Administrative Reports; ug Policies on Drug-Free Workplace, HIV/AIDS Prevention and Control, Hepatitis B, Tuberculosis, ug Anti-Sexual Harassment.
Matod ni Cayanong, atol sa imbestigasyon, way safety officer o first aider sa construction company nga nitunga. Ang mga trabahante wa usab hard hats ug safety shoes o gitawag nga required personal protective equipment (PPE).
Sa report ni Engineer Kenneth James Burbos, LLCO, nga gawas sa kakuwang sa Occupational Safety and Health Standards (OSHS), aduna usab kalapasan nga nakita ubos sa General Labor Standards (GLS). (HBL)