ANG isla sa Bohol wa lang maila sa Chocolate Hills, Tarsier, Kalamay, ug Peanut Kisses kondi daghan pa kini og mga atraksyon nga wa pa masuroy sa mga turista.
Sama pananglit sa Jagoliao Mangroves Farm, isla nga sakop sa Barangay Jagoliao, lungsod sa Getafe.
Ang 2,000 metro kwadrado nga gidak-on sa farm resort gipalibotan sa nagkalainlaing mga klase sa bakhaw o pagatpat.
Gawas nga malingaw ug makapahuway ka, ang resort dunay talagsaon nga hagit sa mga bisita, ang paglakaw agi sa lapok sud sa gibana-banang 200 metros gikan sa farm resort paingon sa barangay proper.
Kaya ra nimo?
Day Tour
Gawas nga mabusog ang imong panan-aw sa kanindot sa palibot sa farm, segurado nga mabusog usab ka sa lab-as ug lamian nga seafoods.
Sa kantidad nga P2,500 matag tawo, sulit ang imong paglaag sa dapit nga moabot lang og usa ka oras ang biyahe sakay sa motor banca gikan sa dakbayan sa Lapu-Lapu.
Duha ka lugar ang gigikanan sa imong biyahe: Barangay Marigondon ug Sitio Angasil, Barangay Mactan, siyudad sa Lapu-Lapu. Mobiya ang motor banca alas 8 sa buntag.
Kon day tour ug manukad ang imong biyahe sa Mactan, tulo ka isla ang inyong adtuon-- Fish Sanctuary sa Sta. Rosa, Olango Island, Caubian Island dayon Jagoliao Island.
Kon sa Marigondon ka manukad, mohapit mo sa Sulpa Islet, Hilutungan Island Marine Sanctuary, Nalusuan Island ug Pandanon Island dayon sa farm.
Challenging usab ang imong pag-adto sa farm resort kay mosubay pa ka sa board walk nga gama sa kawayan nga may gibanabanang gitas-on nga 150 metros diin moagi ka sa kabakhawan paingon na ngadto sa main resort.
Inig abot nimo, dalitan ka og buko juice.
Sa paniudto, matagbaw ka sa “Eat All You Can seafoods.”
Human makapaniudto ug makapahuway kadyot, isuroy ka sa mangroves forest sud sa 30 minutos, dayon mananom mo og mga bakhaw diin mahimo ibutang ang imong pangan sa itanom nimo nga bakhaw.
Kon langyaw, P100 ang bayad alang sa 10 ka seedlings. Kon Pinoy, way bayad.
Moabot sa 55 ka lainlaing mga klase sa bakhaw ang makita sa mangrove forest diin daghan usab ang scallops, alimango ug bangus.
Sa mangroves tour, makita nimo ang gatosan na katuig nga mga bakhaw.
Kon hilig nimo ang adventure, hagiton ka sa tagdumala sa farm resort, ang paglakaw sa lapok gikan sa resort paingon sa barangay proper sa Jagoliao.
Overnight Tour
Kon gusto ka og overnight tour, dunay upat ka mga lawak, duha niini ang dunay aircon ug telebisyon, samtang ang laing duha electric fan ang magamit.
Ang gagmay nga lawak, matag usa, masud ang upat ngadto sa lima ka tawo. Samtang ang dagko, hangtod sa 10 ka mga tawo.
Ang nakalahi sa day tour ug overnight, kay way “Eat All You Can,” kon adto ka sa resort matug. Apan libre na ang imong paniudto, panihapon ug pamahaw sa Overnight Tour. Mahimo pa ka manginhas ug mamana og isda sa gabii.
Samtang, paniudto ug snack lang sa day tour.
Kon molugway ka og usa ka adlaw, dugang P1,500 ang bayad sa matag ulo.
Mahimo usab ka mag-jet skiing, mag-banana boating, snorkeling ug kayaking.
Si Niñolito Abaño, tagdumala sa farm resort, nibutyag nga nagplano sila magdugang og atraksyon sa farm resort sama sa swimming pool ug zipline gikan sa Jagoliao proper hangtod sa mangroves forest.
Ang mangroves forest nga gibanabanang moabot og 13 ka ektarya giingong maoy labing dako sa Asya, matod ni Niñolito, base sa gipahibawo kanila sa Department of Environment and Natural Resources. Ug kini ang ikatulong labing dako sa tibuok kalibotan.
Nahimutang kini sa Sitio Kateroy, ang unang tawo nga nagpuyo sa isla.
Kanus-a nagsugod?
Ang farm resort gibuksan ngadto sa publiko tulo ka tuig na ang nakalabay.
Nadiskobrihan kini human makita sa Google map nga dunay gamay nga yuta sa dapit dihang nangayo og aerial view sa barangay ang kanhi kapitan sa Jagoliao ug karon konsehal, Alejandro Abaño, amahan ni Niñolito.
Si Niñolito niasoy nga nagsugod ang pagpalambo sa dapit dihang ang iyang higala nga Pinoy nga usa ka tourist guide niingon nga nindot palambuon ang lugar gumikan sa presensiya sa daghang mga bakhaw.
Ang ilang higala nga Hapon nga si Nakata Jugie nihatag og P100,000 alang sa pagpahimo og pansayan sa lugar.
Si Niñolito namahayag nga gawas nga malingaw ug ma-relax ka sa farm resort, nindot usab ang pamati nga makatabang ka sa kinaiyahan pinaagi sa imong itanom nga mga bakhaw.
“Ang nakanindot diri kay matagamtam nimo ang eco tour, mapaduol pud ka sa nature,” dugang niini kon unsay kalahian nga masinati sa ilang farm resort kon itandi sa ubang dapit suroyanan.