Bogo City gideklarar nga drug-free

GIDEKLARAR ang dakbayan sa Bogo isip labing una nga local government unit sa Central Visayas nga drug cleared sa Oversight Committee nga gilangkoban sa lainlaing mga ahensiya sa gobiyerno.

Sa kalihokan kagahapon sa Capitol Social Hall, ang tanang 29 ka mga barangay sa Bogo ug 11 ka mga barangay sa lungsod sa San Remigio ang gipangdeklarar nga drug cleared ug ang mga opisyal niini nakadawat og certificates.

Sa Bogo, ang mga barangay naglangkob sa Cogon, Odlot, Binabag, La Paz, Siocon, Guadalupe, Cayang, Anonang Norte, Banban, Marangog, Dakit, Don Pedro, Anonang Sur, San Vicente, Libertad, Polambato, La Purisima Concepcion, Sudlonan, Bungtod, Carbon, Gairan, Lourdes, Malingin, Pandan, Nailon, Sto. Niño, Sto. Rosario, Taytayan ug Sambag.

Samtang sa San Remigio, naglakip sa mga barangay Tambongon, Batad, Gawaygaway, Toong, Lambusan, Busogon, Bancasan, Argawanon, Maño, Libaong, ug Canagahan.

Ang Oversight Committee gilangkoban sa Philippine Drug Enforcement Agency, Department of Interior and Local Go­vernment, Philippine National Police, Department of Health ug Cebu Provincial Government pinaagi sa Cebu Provincial Anti-Drug Abuse Council.

Si PDEA 7 Director Yogi Filemon Ruiz, chair sa komitiba, namulong nga sa dili pa ideklarar nga drug-cleared ang mga barangay kinahanglan nakatuman kini sa 14 parameters sa regulasyon sa Dangerous Drugs Board apil ang way presensiya sa drug pushers, users, marijuana plantations ug laboratories sa ilang mga lugar.

Si Bogo City Mayor Carlo Martinez niingon nga ang kagamhanan sa siyudad nagsilbi nga ‘big brother’ sa pagtabang sa mga barangay sa suliran sa panalapi ug technical.

Pinaagi sa ilang community-based rehabilitation ug reintegration programs, ang drug surrenderees sa ilang dakba­yan nagsilbi nga drug warriors ug maoy nagtudlo sa uban sa dautang epekto sa gidili nga drugas.

“Sila nay monaug sa barangay to explain sa mga cons sa paggamit sa illegal drugs. That’s one step for us to maintain big brother relationship,” matod ni Martinez.

Si Police Regional Office (PRO) 7 Director Jose Mario Espino nisugyot nga gawas sa certificates, nindot nga butangan usab og placards ang mga barangay aron pagpahibawo sa katawhan nga ang maong mga lugar luwas sa gidili nga drugas.

Si Gobernador Hilario Davide III namahayag nga ang dugang 40 ka mga barangay nagmatuod sa way puas sa kampanya sa provincial go­vernment sa pakigbatok sa gidili nga drugas sa pakigtambayayong sa mga ahensiya sa gobiyerno. Unang 120 gikan sa 1,066 ka mga barangay sa lalawigan ang nadeklarar nga drug-cleared.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph