SAYO sa buntag karong adlawng Dominggo mag-abot diha sa simbahan sa Guada­lupe ang posibleng moabot nga usa ka gatos nga mosalmot sa kalihokang “Manglimpyo Kita’g Suba, Bay.”

Gitakda nga inig alas 6 pa­sado sa buntag, mopadulong na ang grupo sa target area nga luyo sa pabrika sa Visa­yan Glass. Anha sa kilid sa pa­brika manaog padulong sa sapa.

Kuyog kanato ang maabtik nga Lt. James Reyes sa Navy Forces Central kun Navforcen nga, uban sa pipila ka element sa Navy, maoy atong ground commander niining inisyatiba nga manglimpyo sa usa ka bahin sa Guadalupe River.

Magpasalamat kita og dako sa atong mga partner ug sponsor sama sa Rotaract Fuente, Nav­forcen, 511th Naval Reserve Squadron, Abante Barangay, Uni­versity of Cebu-Eteeap, Nature Spring, ug pipila ka mga sakop sa Maghisgot Kitag Politika Bay.

Nag-coordinate sab kita sa kadagkuan sa Barangay Guadalupe pinangulohan ni Barangay Kapitan Michael Gacasan ug kang Konsehal Apol Ross Gacasan-Enriquez ug sa Movement for a Livable Cebu (MLC).

Manghinaot kami nga pinaagi niining among kalihokan, masugdan ang taas nga proseso sa pagkumbinser sa mga lumolupyo nga nagpuyo daplin sa sapa sa panginahanglan nga i­­­balik nato ang kalimpyo ug kanindot sa Guadalupe River.

Inisyal nang nahisgutan uban kang Konsehal Enriquez nga sa umaabot pang mga kalihokan, apilan na sa plano ang pipila ka mga adlaw nga education program kabahin sa pag-amping sa atong kinaiyahan.

Ang MLC mismo nag-una pi­­­pila ka adlaw nga milabay sa pag­siguro nga mahanigan ang sa­pa sa pangkontra sa mga ka­gaw.

Abli sab kaayo nga nitanyag si Msgr. Jose Montecillo, ang kura paroko sa parokya sa Guadalupe, sa paggamit sa lapad nga hawanan atubangan sa simbahan alang assembly area sa atong kalihokan.

Encyclical

Naglantaw ko sa mas lapad unya nga matabang sa simbahan niining maong kalihokan karong niluwat na si Papa Francis sa iyang unang Papal Encyclical nga kabahin sa kinaiyahan ug climate change.

Gititulohan kini nga “Laudato Sii” kun “Praise be to You” nga naa sa usa ka kanta nga gisulat ni Saint Francis, ang patron sa ecology.

Sa atong tarp sa kalihokan karong adlawa, atong gikutlo ang usa ka linya sa maong encyclical nga nagkanayon: “The Earth, our home, is beginning to look more and more, like an immense file of filth.”

Sa atong yanong paghubad, “Ang kalibotan, nga atong panimalay ug puloy-anan, nagkaanam nga nahimong usa ka dakong pundok sa hugaw.”

Relevant ang maong linya sa akong nakita diha sa sapa sa Guadalupe. Ang kinaiyahan kay hinimo sa Ginuo apan nahimo na kining usa ka dakong basurahan.

Politika

Basi sa balita gikan sa kaulohan, naapsan na gyud sa duha ka mga nasudnong survey ni Sen. Grace Poe si Bise Presidente Jojo Binay.

Nagpasabot kini nga padung na pagkasukarap ang kampanya sa bise presidente bisan og wa pa moabot ang deadline sa pagsang-at sa certificate of candidacy.

Mopadayon ba kini si Binay? Atong gituohan nga mo­padayon kay nakahunat na bisan pa man og nagkahinay ang iyang popularidad.

Unsaon kay nagpataka man sab og pang-atake kang Sen. Poe ang kampo ni Binay.

Ang pangutana karon kay magamit kaha ni Poe kining iyang popularidad alang sa iyang pagdagan alang sa labing taas nga katungdanan sa nasud o mosugot ba siya nga makig-partner kang DILG Secretary Mar Roxas?

Nakita man sab gud sa survey nga nagkasaka sab ang ratings ni Roxas ug within striking distance lang siya. Sayo pa sab kaayo nga mobwelo karon. Layo pa kaayo ang piliay ug usa sa problema sa mga early leaders kay mahutdan og gas inig abot sa finish line.

Ug dakong bentaha ni Roxas ang pag-endorso unya ni Presidente Noynoy Aquino kaniya. Lahi sa negative popularity ni kanhi president Gloria Macapagal-Arroyo kaniadtong 2009, karon nibalik na sab hinuon pagsaka ang ratings ni Noynoy.

(@anol_cebu sa Twitter)