DADDY, Papa, Tatay, Itay or Papi. Mao kini ang itawag sa mga anak ngadto sa ilang mga amahan. Ang amahan maoy gi-ila nga haligi sa pamil­ya. Siya maoy pundasyon sa ma­tag banay. Siya maoy iwag a­lang sa maayong kaugmaon sa iyang mga anak. Siya maoy naningkamot aron mahatag ang matag panginahanglan sa iyang pamilya.

Magpatulo siya sa iyang mga singot ug luha aron mahatagan og maayong kaugmaon ang iyang pamilya. Dili lalim ang papel nga gipas-an sa usa ka amahan.

Matag ikatulong Dominggo sa buwan sa Hunyo gisaulog ang Father’s Day. Adunay pormal nga deklarasyon niini didto sa Estados Unidos. Ang Mother’s Day gisaulog usab matag ikaduhang Dominggo sa Mayo. Ang paghatag og pasidungog sa mga amahan ning maong adlaw nagsugod didto sa Estados Unidos.

Niadtong 1910, maoy u­­nang selebrasyon sa Father’s Day didto sa Spokane, Wa­shington sa dihang si Sonora Smart Dood maoy naningka­mot nga mahatagan og pasi­dungog ang mga amahan. Si Sonara nga taga Arkansas, na­­kahunahuna sa pag-lobby a­lang sa kasaulogan sa Father’s Day isip paghatag og pasidungog sa iyang amahan nga usa ka beterano nga si William Jackson Smart. Ang amahan ni Sonora nga usa ka single parent na­ningkamot nga mabuhi silang unom ka mga magsuon.

Mao nga nakadayig siya pag-ayo sa iyang amahan sa pag-amuma ug pagmatutu kanila. Mao nga naningkamot siya nga mahatagan og pasidungog ang iyang amahan. Ang Father’s Day namugna human masaulog usab ang Mother’s Day nga gipirmahan ang opisyal nga deklarasyon ni President Woodrow Wilson niadtong 1972. Pero sa wala pa ang official declaration sa Mother’s Day, ang Father’s Day dugay na kining gisaulog sa Estados Unidos.

Mapasagdan

Hinuon, dili tanang amahan ang midala sa ilang maayong papel sa ilang pamilya. Aduna usab diha ang nagpasaway ug buluyagon. Ilang gi-abandonar ang ilang obligasyon ngadto sa ilang mga anak. Adunay uban nga mao man gani nagtukmod sa ilang mga anak ngadto sa kaala-utan. Kanang mga amahan nga nagbisyo labi pa sa mga nagumon sa illegal nga drugas. Unsa man ang ikahatag niini ngadto sa ilang mga anak? Apan sige na lang kay sila mga amahan man gihapon. Happy Father’s Day sa tanang buotan, sulundon ug bisan kadtong buluyagon nga mga amahan. (bobby.nalzaro@yahoo.com)