KARONG adlawa, dunay mga 100 ka mga tawo nga manglimpyo sa usa ka bahin sa Guadalupe River isip unang lakang sa pag-rehabilitate sa mao nga sapa.
Ang mao nga sapa usa sa duha nga gitinguha nga i-rehabilitate kun buhion pagbalik human sa katuigan nga pagpasagad. Ang usa mao ang Butuanon River nga naa sa mga dakbayan sa Sugbo ug Mandaue nagtadlas.
Ang Mandaue naggahin na og P13 milyunes alang sa rehabilitasyon sa sapa, samtang tak-om pa ang dakbayan sa Sugbo.
Bisan gani kining tinguha karon sa paglimpyo sa Guadalupe lakang kini nga gipangulohan sa Movement for a Livable Cebu nga gisuportahan sagad sa mga pribadong tawo ug grupo.
Importante kaayo ang pagbuhi og balik sa duha ka dagkong mga sapa sa dakbayan sa Sugbo. Apan mahimo lang kini kon dunay pagtinabangay di lang sa kagamhanan ug concerned citizens, kon di sa mismong mga komunidad nga nagpuyo sa daplin ug duol niini.
Makita unta sa mga taga Guadalupe ug uban pang mga lumolupyo nga bisan ang mga tawo nga wa magpuyo sa mao nga dapit nagpakabana sa paglimpyo sa sapa, sa pangindahay nga ugma damlag mobalik ang kaanindot ug kalimpyo sa agos sa tubig.
Mahimo usab kini kon bisan mismo ang kagamhanan mohunong sa paghimo sa sapa nga sangkuanan sa mga drainage systems nga usa sa mga dakong nakatampo sa kahugaw.
Mao nga napakyas ang una pang mga lakang sa pagbuhi sa duha ka mga sapa kay bisan mismo ang kagamhanan kuwang sa kaikag sa pagbuhat niini.
Apan karon nga nangusog na og maayo ang pribadong sector, mapugos ang kagamhanan sa pagsustener ning mao nga tinguha.
Wa bayay di makab-ot nga damgo ug tinguha kon magtinabangay ang tanan. Dinhi, seguradong makab-ot ang maanindot nga kausaban.