USA ka bag-ong serye nga makita nato sa CCTN channel 47 ang “Pagpili money or love?”

Sa presscon nga gipahigayon sa “Ea party place and needs” akong nahinabi ug nahimamat ang tibuok cast niini.

Ang writer ug direktor nga si Mildred Montesclaros namulong nga gawas sa drama may komedi ug labaw sa tanan may mga pagtulon-an tang makuha sa maong salida.

Istorya kini sa usa ka ulitawong si Daniel nga manguyab og dato kay mao kini ang sugo sa iyang amahan nga si Mando. Kay mao kini ang solusyon haron mahaw-as sila sa ilang kakabus.

Amahan ug anak nga konsehal sa Talisay city, sa tinood nga kinabuhi ang nagdala sa samang papel. Si konsehal Val Ylanan ug anak ining si Val Joseph Ylanan. Ang duha ka babaye nga maoy pilian ini sila si Lavenia (Lormil de Gracia) ug Vivian (Joan Amores).

Ania usab dinhi sila si Rutchel Borbajo isip bespren ni Lavenia ug partner ini si Lorte Cabrera nga maoy maglingaw nato sa mga pasiaw ug komedya uban usab ni Eden Cardenas, Franklyn Padayogdog ug Bobby Entienza.

Sa pangutana kon sa tinuod nga kinabuhi unsay ilang pili-on hapit tanan cast lakip na’s direktor pabor sila sa gugma gawas kang Joan ug Eden nga balanse lang.

Mabalik ta sa bidang lalaki dinhi nga si Val Joseph mipadayag nga gawas sa pag-arte nagdako kini nga maabilidad na. Maayong mokanta ug mosayaw ang ulitawo ug kasamtangan kining nag-eskwela sa CIT.

Sa pangedaron karon nga 21 dili pa siya andam sa seryosong relasyon kay daghan pa kaayo kini ug mga gustong buhaton.

Gawas sa politika, ang makahuman sa iyang kursong gikuha ug ang pagdumala sa ilang family business labi na nga nag-inusara lang siyang anak. Pangandoy sab niya nga maapil sa “star magic” sa Kapamilya.

Gidapit sa tibuok cast labi na ni sa executive coordinator ini Teresa Diez sa pagtanaw sa serye. “Pagpili money or love” nunti matag gabii gikan Lunes hangtud Biernes alas-8 ngadto sa alas-8:30 ug may replay kini matag alas-11 sa buntag sa CCTN channel 47, ay’g saba!!!