`Pundok Nissan’ gimugna sa Nissan Cebu

NAGKAHUGPONG ang mga nanag-iya og mga kotseng Nissan, lakip na sa mga modelong 25 anyos na, ug mimugna sa “Pundok Nissan” nga mipahigayon og “Nissan Ride & Drive” atol sa pagsaulog sa nasudnong kagawasan niadtong Hunyo 12.

Atol sa kalihukan, gipasaligan ang ilang mga ginsakopan sa Nissan Cebu Distributors, Inc. nga may mga pisa silang matanyag, inubanan sa mas maayo na karon nga pagpangalagad, alang sa ilang mga sakyanan, pipila nila mga karaan na, mga 25 anyos pa gani.

Gipadayag ni Dante Colina, parts and services manager sa nag-inusarang awtorisadong dealer sa Nissan, ang maong pasalig atol sa paniudto sa The Ranch Resort sa dakbayan sa Toledo.

Miuban sa caravan ang labing bag-ong modelo nga mga awtong Nissan sama sa Almera, Sylphy ug Altima, compact SUV nga Nissan Xtrail, pick-up nga Nissan Navara, van nga Nissan Urvan ug SUV nga Nissan Patrol.

Naghupot ang Nissan Cebu og pi­pila ka tinipigan nga mga pisa alang sa mga kotseng hinimo pa sa tuig 1990 ug bisan sa sayo pa, matod ni Colina.

Dali ra sab sila makakuha gikan sa Nissan Philippines, Inc. (NPI) ug sa Nissan Motor Corp. sa Japan basta adto nila ipaayo ang ilang mga sak­yanan sa Nissan Cebu sa dakbayan sa Mandaue, duol sa Maguikay flyover.

“Komitido ang Nissan nga moabag kanunay sa mga nanag-iya og awtong Nissan. Ingon niani ang atong paghatag og kabulahanan sa mga namalit og mga kotseng Nissan,” mipadayag si Julie Sy Tio, general manager sa lokal nga Nissan dealer.

Napalanog pa kini sa mensahe sa pangulo sa NPI nga si Antonio Zara nga gibasa sa mga sakop sa Pundok Nissan sa iyang area sales manager nga si Gemma A. Hernandez nga miuban nila sa kalihukan.

Sa ilang panagtapok, gipaila sab ni Hernandez ug gipasabot ang mga kagawian sa kasamtangang Nissan Sylphy nga nagagikan sa pipila ka henerasyon sa Nissan Sentra, Bluebird ug California nga susama sa gipangmaneho hangtud karon sa mga sakop sa Pundok Nissan.

Nag-inambitay sab sila kabahin sa Motorsports 101 uban sa mga malampusong Pilipinhong tiglumba nga sila si Pepon Marave ug Charlie Cruz, kinsa daan nang tigmaneho og Nissan sa wala pa sa ilang pagpangarera. (PR)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph