Nadela: 'Peace Zone' gihulgang bombahan

ANG pinakadakong balita sud ning semanaha mao ang hulga sa pagpa momba nga gipaagi sa tawag sa telepono gikan sa usa ka caller. Si Rhea Sarmiento, ang secretary ni Dr. Bianito Dagatan, DepEd Cebu City Division Supt. maoy unang biktima sa makahahadlok nga tawag. Naanad na ni si Rhea pagpanubag ug mga tawag sa telepono kay apil man sa iyang trabaho.

Pero kay hulga man lage sa pagpamomba ang iyang nabatian sa pikas linya naigking sab siya. Ikaw ba’y tawgan nga dunay bomba nga paulbohon sa ilang buhatan. Samtang nagdali pagpang gawas ang mga empleyado, wa sab magdugay ang ilang silingan nga Zapatera Elementary School mao na sab ang nakadawat sa susamang tawag.

Way labot sa DepEd Cebu City lima ka eskwelahan ang gihulga ug nikulit kini ug kasaysayan nga pinaka daghan nga eskwelahan nga gihulgang bombahan sud lang sa pipila ka minutos. Kining tanan girespondihan sa kapulisan ug militar apil na ang mga bombero ug nigawas nga negatibo. Pagpanghadlok ra gyud ang motibo. Pagpanghadlok nga niresulta sa pagka suspenso sa klase sa 54 ka tunghaan sa high school, 68 ka tunghaan sa elementarya ug usa ka extension diha sa Barangay Ermita.

Dakoa ug kadaut nga na­mugna sa maong hulga. Daghang ginikanan ilabi na sa Zapatera gibati ug kahadlok bisan sa panawagan nga mokalma lang. Sa Cebu City Central School nga apil sa gihulga maayong pagkatimon sa Principal nga si Ma’am Lyra Illaga kay gipatuo nila nga mag earthquake drill ang mga bata mao nga hapsay nga nanggawas padung sa evacuation area nga mao ang oval sa Sports Center nga ilang silingan.

Samtang nag-cover ko sa maong alarma diha’y dag­hang scenario nga nisud sa akong hunahuna. Tungod sa kadaghan sa eskwelahan nga gipangtawgan nakaingon ko kung di kaha ni paagi aron malipat ang otoridad kay duna pa’y mas bug-at nga plano. Sa press conference giuyonan ni Col. Joel Doria ang akong pangagpas nga wa sab hinuon matinuod. Para nako daghang hilisgutanan ang angay tukion labot sa maong kasinatian. Kana lang gud maatlan ka nga mohagiyos sa karsada ang nagwangwang nga ambulansiya. Unya, taudtaud moagi ang laing nagwang ang nga patrol car sa pulis.

Maglain gyud ang imong hunahuna nganong ambulansiya ug pulis ang nagsunod ug nagdali. Unya diay to lainlain ang ilang gialarmahan. Ubos sa gitawag nga Police Operational Plan di man pwede nga maghurot ang pulis pagtubag ug usa ka alarma. Mao sab na ang gibuhat ni Col. Doria. Kay simbako duna pa’y mas dako nga nahitabo taliwala sa tawag nga panghadlok makasiguro kita nga marespondihan diha diha ang alarma.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph