GIAWHAG ni Mayor Michael Rama ang mga Sugbuanon nga mangaliya aron wa nay babag ang katukoran sa unang parte sa Cebu City Medical Center (CCMC), kansang winning bidder gipahibawo na sa Bids and Awards Committee.

Ang C.E. Padilla nga nagbase sa dakbayan sa Quezon maoy gideklarar nga lowest bidder human sila ni-bid og P514 milyones gikan sa P600 milyones nga gitagana alang sa CCMC.

Ilang gilupig ang laing upat ka bidders.

Si Rama tua karon sa Australia.

Ang mayor nibutyag nga iyang ipresentar sa iyang counterpart sa Parramatta City sa Sydney, Australia, sister city sa Cebu City ang kalambuan sa CCMC aron makakuha og dugang pundo.

Si Rama nibutyag nga iyang ipadayon ang iyang ‘pagka-professional beggar’ aron pangulitawhan ang mga igsuong siyudad sa dakbayan ug ang grupo sa mga Pilipino nga nagbase gawas sa nasod.

“Sisterhood is mutual cooperation, collaboration, cultural exchanges and what we call business opportunities,” dugang sa mayor.

Human sa pag-ila sa lowest bidder ug kon mopasar ba ang C.E. Padilla sa post qualification nga ilusad sa BAC, hayan masugdan ang construction sa pampublikong tambalanan sa Siyudad karong Hulyo.

Ang permit sa construction nga gihatag gikan sa Department of Health (DOH) alang sa katukoran sa CCMC mo-expire sa hinapos sa Hulyo.

Ang 10 ka andanang CCMC mogasto og di mominos P1.3 bilyones, lakip sa command center.