GIPAABOT nga makaangkon na sa gikinahanglang mga ekipo ang mga tambalanang publiko sa lalawigan sa Sugbo sa mosunod nga tulo ka buwan.
Si Joe Sepe, pangulo sa Provincial General Services Office (GSO), nibutyag nga subay sa gitinguha nga hospital upgrade ilabi na sa mga laboratoryo niini, namalit ang Kapitolyo og laboratory diagnostic machines.
Anha kini ipamutang sa dagkong mga tambalanan sama sa mga provincial hospital apan, mahimong makapahimulos niini ang ubang pasyente sa mga district hospital.
Dugang ni Sepe nga mopahimutang sab sila og mga bag-ong ultrasound ug x-ray machines.
Gipaniguro niya nga naa sa maayong kondisyon sulod sa 24 oras aron mahimong magamit sa bisan unsang oras nga kinahanglanon kini.
Karong Nobiyembre, gitinguha ni Sepe nga hingpit nga maestablisar ang duha ka mga dialysis center sa probinsiya.
Gipadayag niya nga tumong sa pag-upgrade sa mga ekipo sa mga tambalanan sa probinsiya mao ang paghimo nga fully-functional sa tanang level 1 hospital ug di mabiyaan ang kalidad sa serbisyo sa ilang district hospitals.
Ang Kapitolyo maoy nagdumala sa upat ka mga provincial hospital sa Sugbo ug laing 16 ka district hospitals.
Gihikay na sa kagamhanan sa probinsya ang mga gikinahanglang dokumento sa Department of Health (DOH) alang sa upgrading sa tanan niining tambalanan.