DAGHAN ang nangreklamo sa mga sumasakay ug motorista sa grabeng paghuot sa trapiko ning semanaha. Nadungan kini sa pagbukas sa klase.

Ang paghuot sa trapiko nahimo nang normal nato. Diha lang sa amoa sa Talamban-Bacayan-Pit os area, grabe ang trapiko sa buntag. Labaw pay nagsunod og porlon ang mga sakyanan sugod sa alas 6:30 sa buntag ngadto na sa alas 8:30. Mao nang akong mga anak nga dunay klase sa alas 7:30, mang­lakaw og wa pay alas 6:15. Kay kon di kini nila buhaton, segurado silang ma-late.

Mga tulo ka tuig ang nakalabay, nag-anam usab og kauso sa amoa mismong lugar ang habalhabal nga kaniadto naa lang sa mga eskina sa Pit-os ug Talamban. Bunga gihapon kini sa panginahanglan og kasakyan nga mas dali kay sa taxi.

Sa plete nga P120-P130 gikan sa amoa padung sa kinapusoran sa Cebu City, seguradong di ka ma-late sa trabaho o tunghaan kay sa mag taxi ka nga mapiit ka sa trapiko. Sa akong kasinatian, ang deperensya sa travel time sa PUJ ug taxi taliwa sa trapiko, 10 minutos lang.

Modaghan

Mao nang di ikahibung nga nagkadaghan ang mga motorsiklo sa kadalanan. Huna-hunaa, kon magplete ka kada adlaw og labing minos P100, mas maayong magpalit ka na lang og motorsiklo. Imoha pa ang sakyanan kon maimpas ang utang. Mahimo ka pang mag sideline og habalhabal kon dunay bakanteng oras.

Gawas sa motorsiklo, ang biseklita magamit ug mas barato pa. Less ang maintenance. Kon nagpuyo ka og tulo ngadto sa unom ka kilometro sa imong trabahoan, di ka panington og sikad. Di man gani ko hapit sington gikan sa amoa padung sa Sun.Star nga ang gilay-on 10.3 kilometros kon sa Ayala ka moagi tadlas sa may Seminario Mayor ug MJ Cuenco. Maka bonus ka pa sa exercise. Panington lang ko kon paspasan ang tindak.

Kining duha ka mga matang sa transportasyon labing epektibong panagang sa trapiko karong panahuna. Sa matang sa atong lifestyle karon nga puno sa fastfood kay kanunay nagdali, maa­nindot ang biseklita.

Mao na nga karon, ayaw padala sa normal. Lingkawas gikan sa naandang trapiko pinaagi sa biseklita o motorsiklo. Kon di ka makahimo, nahala matag sayo sama sa among mga anak aron di ka ma late.

Father’s Day

Liko ko og gamay sa hisgutanan sa biseklita. Na touch ko kay gigahinan gyud og panahon sa among kamanghuran nga anak ang paghimog gamay nga card nga ginama sa bondpaper. Iya ning gisuwatan og mensahe sa Father’s Day.

Nahinumdom ko sa among anak nga babaye nga si Mary Heart nga sagad makahuna huna sab niini matag dunay espesyal nga okasyon. Mapuno ko sa kiss sa di pa ko mobangon. Karon nga kasaulogan sa Father’s Day, nahinumdom ko sa iyang labing paborito, ang biseklita. Sa tanan namo, siya ang labing unang dunay biseklita.

Gimingaw hinuon ko sa among anak.

Busa karong adlawa, mobiseklita ko padung sa Danao City kauban ang akong higala nga si don Alexis Comaingking. Maayo untag way mga kakulian.

Sa tanang siklistang mga amahan, Happy Father’s Day.