GIKATAHO sa ESPN website nga "gipakaminos" ni superstar LeBron James ang coach sa Cleveland Cavaliers nga si David Blatt atol sa 2015 National Basketball Association (NBA) Finals batok sa Golden State Warriors.

Usa ka sideline reporter sa ESPN Radio nga si columnist Marc Stein misuwat og artikulo kabahin sa pagtrato ni James ngadto kang Blatt atol sa finals.

Gisuwat ni Stein, kinsa personal nga nakakita sa mga panghitabo sa habig sa Cavaliers, nga si James mao'y motawag og timeouts ug substitutions unya bulgar kining mangasaba kang Blatt kon dili kini makauyon sa desisyon sa rookie roach.

"LeBron emasculating Blatt in ways that are simply unbecoming of a player of James legend-in-the-making stature," suwat ni Stein sa iyang ESPN column.

Matod pa ni Stein, aduna'y usa ka higayon nga milingolingo sa iyang ulo si James ug masuk-anon kining misupak sa usa ka set play nga gihimo ni Blatt sa Game 5 hinungdan nga napugos si Blatt sa paghimo og laing set play.

Si Blatt kalmado rang mitubag dihang gipangutana kabahin niini ug igo lang miingon nga aduna gihapon silay positibo nga relasyon sa four-time MVP.

Taliwala sa ilang naangkong kapakyasan sa finals, 4-2, nakitaan gihapon og hayag nga kaugmaon ang Cavaliers.

Sa iyang pagbalik sa Cleveland human sa upat ka mga tuig sa Miami Heat, nipahimangno nang daan sa Cavaliers fans nga dili magdahom og dako apan nahatod niya ang team sa finals.