NILANTAW ako sa usa ka "prayer rally" sa TV kaniadto ug sa katapusan nikanta sila og awit nga "God is the answer!"
Matod pa sa namulong nga Pastor nga ang Ginoo ang tubag sa tanan.
Nindot kaayo ang kanta ilabi nga tinuod nga kinahanglang mosandig kita sa Ginoo sa atong gihambin nga problema sa kinabuhi karon.
Daghan ang nisayaw, nihilak, nangluhod nga nagdupa sa kamot uban sa duyog sa kanta.
Apan nakapangutana ko sa akong kaungalingon nga "What is the question?"
Wala ako nag-ingon nga mopahilayo kita sa Diyos ug dili mangayo sa Iyang giya sa atong pagpuyo sa kalibutan.
Apan dili tanan tingaling pangutana ipatubag sa Ginoo kay gi-ingon man nga "lihok tawo kay tabangan ko ikaw." Pareha pananglit kining pagpili nato'g sunod nga presidente ug bise-presidente sa nasud.
Basin baya naghandom ta'g Ginoo ang modagan nga mosulbad sa tanang problema sa katilingban.
Presidente nga tarong, kugihan ug may kaalam sa pagpalambo sa nasud ang atong gikinahanglan.
Mangayo ta'g tabang sa Ginoo nga ablihan ang atong salabutan ug kasingkasing sa pagpili og maayo ug dili kay ilado ug nakadawat ta'g (BOTA) bugas, odong (noodles), tinapa ug alawans gikan sa mga kandidato.
Kung maminaw ko sa mga yangongo ug reklamo sa tawo sa gobyerno makaingon ko nga nangita ang tawo og Ginoo ug dili presidente aron mosulbad sa tanan.
Mora ba'g madyikero nga sulbaron niya ang tanan sa usa lang ka pagpamilok.
Para nako walay makasulbad sa dagkong problema sa nasud bisan lumpungon pa ang tanang maayong laking politiko nato karon.
Kung si Mayor Rody Duterte pa ang pasultihon wagtangon niya ang Kongreso ug Senado kung siya ang ma-presidente.
Dili na kaya ang band-aid o tambal nga herbal sa problema sa nasud kon dili major operation sulod sa Intesive Care Unit (ICU).
Busa matingala ako nganong daghan ang gustong modagan pagka-presidente? Wa ba sila malisang sa dakong problema nga ilang sagubangon, wa pay labot ang posibleng pagkapriso tungod sa nagpungasing kaso sama sa nahitabo nila ni Presidente Joseph "Erap" Estrada ug Gloria Macapagal Arroyo?
May TV interview pa gani kang Kris Aquino, ang manghod ni PNoy nga nisulti siya nga dili siya mosabak sa politika kay tabangan daw una niya ang iyang Kuya kay kahibalo siya nga daghang kaso ang ibato kaniya human sa iyang termino sa 2016.
Posibleng resbakan siya sa pipila niya ka nabuhat o wala mabuhat sama sa pagdakop kang GMA sa airport, sa isyu sa PDAF ug DAP, BBL, Napoles scam ug SAF 44.
Mao nga kinahanglang higala ni PNoy ang mosunod nga presidente aron dili siya maparehas ni GMA nga naka-wheelchair sa iyang selda.
Busa dili kita mag-ilusyon nga masulbad sa sunod nga presidente ang atong tanang problema sa kapobrehon, walay trabaho, utang sa langyaw'ng nasud, away sa China, insurhensiya, kidnapping ug trapiking, druga, patay, human rights violations, kalamidad ug uban pa.
Sublion ko nga dili siya Ginoo busa andamon lang nato ang daghang pasyensiya, hugot sa bakus, pag-amping ug pag-ampo nga walay dakong katalagman nga moabot sa atong nasud sa sunod nga unom ka tuig. O, ganahan pa mong modagan?