MAGUINDANAO PROVINCE -- Gihagit ni Moro Islamic Liberation Front (MILF) 1st Vice Chairman for Political Affairs Gadzaali Jaafar nga angay pamatud-an sa mga grupo ug indibiduwal ang alegasyon nga duna sila'y 10 ka himuanan og armas sa probinsiya.
Kini mao'y nahimong reaksiyon ni Jaafar sa akusasyon ni Magdalo partylist Congressman Gary Alejano nga naa sa sulod sa mga kampo sa MILF ang ilang himuanan og mga armas.
Kini subay sab sa intelligence report nga nakuha ni Alejano apan wala sab nila gibutyag kon gikan sa militar o kaha sa kapulisan.
"Dapat may mga 'hard facts' sila tulad ng larawan na magpapatunay sa nasabing alegasyon kasama na ang pagsasagawa ng recruitment at training," pagklaro ni Jaafar.
Gidugang ni Jaafar nga kung dunay ebidensiya si Alejano angay nga isumite niya kini sa GPH Peace panel ug dili idiretso sa media.
Dako ang pagtuo ni Jaafar nga gigamit lamang ni Alejano ang isyu alang sa kaugalingong political interest ug dili ang kaayohan sa katawhan.
Gidugang ni Jaafar nga ang Bangsamoro Basic Law (BBL) gihimo nga sumsuman sa mga politiko nga gusto nga magpahumot sa nagsingabot nga 2015 election.
Gihingusgan pa ni Jaafar nga sensiro sila sa naasoy nga kasabutan kon diin gi-antos nila ang pinakadugay nga peace negotiation ug miabot na sobra 30 ka tuig aron lamang makab-ot nila ang tinuod nga kalinaw ug kalamboan sa Mindanao.(Edgar E. Fuerzas)