PADAYON pa ang joint session sa Ubos Balay Balauranan ug Senado samtang nagsulat ko niining lindog. Apan nabalaka ko nga dunay wa matuki pagmaayo ang mga isyu kabahin sa martial law.
Pananglitan, nagkagamay ang mga sakop sa Maute ug Isis nga naalirongan na sa grabi kadaghan ang mga sundawo. Nagkinahanglan pa ang atong militar og dugang 150 ka mga adlaw nga martial law? Ingon ana pa ang kadugayon nga makadaog ang atong kasundalohan?
Ikaduha, wa sila makahibawo kon pila na ang nagasto niining maong gubat ug pila pay gastuhon sa kagamhanan kon madayon ang extension sa martial law. Alang nako man gud, way klarong paagi sa pag-audit kon pila na ka bomba ug pila na ka bala ang nagamit. Mag-agad lang gyud kita sa pagka matinud-anon sa mga sundawo.
Wa pa gyud ko makalimot sa mga istorya sa usa ka kanhi sundawo sa Basilan kabahin sa iyang mga kauban.
Matod pa niya, ilang ibaligya ang ilang mga bala aron ipadala sa ilang pamilya ug pangbisyo sama sa inom ug babaye. Malipay daw sila kon dunay encounter kay ilang i-report nga nagamit sa bakbakan ang mga bala nga nabaligya.
Manghinaot na lang ko nga wa kini mahitabo karon sa Marawi. Apan lisod tuohan nga ang mga kurakot nga sundawo (pwera lang sa mga maayo) nabut-an og kalit, di ba?
Tungod niini, alang kanako mas maayo nga tan-awon dayon sa Kongreso ang gasto sa maong gubat.
Ikatulo, dakong isyu kining paglapas sa tawhanong katungod. Moingon ang military nga way mga nahitabo. Ang Commission on Human Rights (CHR) nagkanayon nga nag-evaluate pa sila sa mga taho nga ilang nahipos. Apan ang mga NGO duna nay mga taho sa pang-abuso.
Ang ato lang kay kon dili bantayan ang mga human rights violations, mao kining makapadaghan na hinuon sa mga terorista.
Ikaupat, ang mga bakwit gusto na mamalik sa Marawi ug makasugod na pagbalik sa ilang naandang kinabuhi.
Tungod niining mga punto, wa gyud nuon ko makumbinser nga gikinahanglan ang pag-extend sa martial law diin magpatigbabaw ang pagdumala sa military.
Yellow diay?
Halos tanang mga nagtrabaho sa pantalan sa Syudad sa Sugbo nasuweto kaniadtong panahon sa kampanya sa 2016 nga ang district collector sa Bureau of Customs niadtong tungora nga si Koko Holganza nagsuporta kang MRRD kun si Mayor Rodrigo Roa Duterte.
Mao nga kataw-anan kaayo ang napublikar nga poison letter kabahin sa Korean garbage nga kuno gi-import kini aron ilabay sa Inayawan.
Kining unang impormasyon pa lang kabahin sa gisuportahan ni Holganza nga Yellow kuno dakong sayop. Mao kon kini pa lang daan sayop na, nganong motuo pa man kita sa ubang pang mga detalye sa maong poison letter?
(@anol_cebu sa Twitter)