NAKADAWAT sa pasiunang “biyaya” kun gasa ang mga beneficiaries sa programang “Biyaya ng Pagbabago Tungo sa Masagana at Matiwasay na Buhay Pilipino” atol sa opisyal nga paglunsad niini dinhi sa Sugbo nga gipahigayon sa Cebu Technological University (CTU) kagahapon.
Mga nahatag kagahapon sa Bureau of Fisheries and Aquatic Resources (BFAr) naglakip sa 10 ka fishing nets, daghang mga makina sa bangkang panagatan ug 22 ka fishing boats ngadto sa 44 ka beneficiaries gikan sa 10 ka mga distrito sa Sugbo.
Ang Technical Education and Skills Development Authority (Tesda) nanghatag og 2,500 TecVoc Scholarships sa Cebu.
Ang Department of Public Works and Highways (DPWH) nihatag og usa ka multi-purpose building sa Bangkal, Lapu-Lapu City samtang ang Department of Environment and Natural Resources (DENR) niisyu og land patents.
Laing nadawat nga mga serbisyo sa mga benipisyaryo mao ang libreng dental sa Department of Health, libreng seedlings sa Department of Agriculture ug cacao plant sa DENR ug uban pa.
Tumong sa programa mao ang pagpalambo sa kahimtang sa 6.5 milyunes ka mga Pinoy nga maisip nga labing kabos sa mga kabos.
Si Visayas Lead Convenor Doris Mongara niingon nga ang KP usa ka national movement sa supporters ni Presidente Rodrigo Duterte nga dunay 300,000 ka mga sakop sa Visayas.
Ang maong programa iya sa Office of the Cabinet Secretary pinanguluhan ni Secretary Leoncio “Jun” Evasco ubos sa pakigtambayayong sa Kilusang Pagbabago movement.
Adunay 21 ka mga ahensya sa gobyerno ang ningsalmot ug ninghatag sa ilang serbisyo.
Kini naglakip sa DA, BFAR, Philippine Statistics Authority (PSA), Department of Interior and Local Government (DILG), Philippine Coconut Authority (PCA), Department of Trade and Industry (DTI), DENR, Cooperative Development Authority (CDA), National Food Authority (NFA), Philippine Information Agency (PIA), DOH, Department of Agrarian Reform (DAR), Department of Social Welfare and Development (DSWD), Social Security System (SSS), TESDA, Housing Agencies, Department of Labor and Employment (DOLE), National Irrigation Administration (NIA), Philippine Commission on Women, Department of Tourism (DOT) ug 8888 Presidential Complaints.
Gipahigayon usab sa maong kalihokan ang oath of commitment sa mga ningsalmot nga government agencies.
Sa kinatibuk-an, adunay gibana-bana nga 5,200 ka tawo ang misalmot sa maong kalihokan.
Mokabat sa2,300 gikan sa dakbayan sa Lapu-Lapu, 1,010 gikan sa Cebu City South district, 1000 gikan sa north ug 890 gikan sa nagdaiyang dapit sa probinsya sa Sugbo.
Si Undersecretary Jose “Pinpin” Libres sa Office of Participatory Governance (OPG) niingon nga ang rason sa ilang pagpasalmot sa tanang mga ahensya sa kagamhanan mao pag-umol og mga paagi aron pagpaminos sa kakabos sa nasod.
Gawas kang Libres, nanambong naglakip kanila ni Evasco, Undersecretary Dale Cabrera, Undersecretary John Vistal ug Assistant Secretary Jonas Soriano. (EOB & Nova Leah Carbon CNU Intern)