NIKAMPANIYA alang sa “people to people conversation” si Supreme Court Acting Chief Justice Antonio Carpio aron mapanalipdan ug mabarugan sa mga Pilipino ang katungod niini sa kontrobersiyal nga West Philippine Sea nga giangkon sa nasud sa China.
Si Carpio, nga maoy pinasidunggang dinapit sa graduation ceremony sa University of San Carlos School of Law kagahapon, miawhag sa mga graduates, lakip na sa ilang mga ginikanan ug sa matag usa ka Pilipino, nga edukahon ug pasabton ang mga Intsik, nga iya sa Pilipinas ang West Philippines Sea.
Kini pinaagi sa malinawon nga pagpadayag diha sa social media ug internet, aron usab maablihan ang huna-huna sa mga Chinese labot niini.
Sigun ni Carpio, lisud kon ipamugos sa Pilipinas ang katungod niini sa gikagubtan nga maritime zone, pinaagi sa pagpakig-gubat sa China, sanglit dili makasarang ang atong nasud sa military resources.
Sa laing bahin, nagdumili si Carpio paghatag ug detalye sa gihusay nga quo warranto case sa Supreme Court En Banc batok ni Chief Justice Maria Lourdes Sereno. Hinuon iyang gipadayag nga sa sunod buwan, hingpit na kining madesisyonan sa en banc.
Sa susamang higayon, Giila niya ang katakos sa mga law school gawas sa Metro Manila, ilabi na sa USC School of Law, nga maka-produce Og dekalidad nga mga graduates ug umaabot nga mga abogado.
Sa Abril 26 gitakda nga ipagawas ang resulta sa 2017 Bar Examinations, diin kapin sa 7 mil ka mga indibidwal ang nikuha sa pasulit niadtong Nobiyembre sa miaging tuig.
Atol sa graduation ceremony, upat ka graduates ang gipasidunggan. (AZDL)