PADAYON nga gigukod sa kapulisan ug kasundalohan ang New People’s Army nga maoy nag-ambush sa kapulisan sa Guihulngan City niadtong Biyernes sa buntag.
Samtang nasayran nga niadtong 2016, atol sa eleksiyon, aduna na’y hulga si City Councilor Edison Dela Rita diin gisulod sa iyang panimalay ug gipusil apan wa maigo.
Kasamtangan nga gipahigayon sa 76th Infantry Battalion sa Philippine Army ang hot pursuit operation batok sa mga komunista inubanan sa 303rd Army Brigade.
Matod sa tigpamaba sa Guihulngan City Police Station nga si PO2 Francisco Petiluna kinsa nahinabi sa Superbalita Cebu nga ni-augment na ang Police Regional Office 18 og dugang personnel sa ilang estasyon human sa pagkamatay sa ilang unom ka mga kauban, lakip ang ilang hepe nga si Supt. Arnel Arpon.
Sa pagkakaron, si Supt. Carlos Lacuesta, deputy provincial police director for operations, ang nilingkod nga officer-in-charge (OIC) sa maong estasyon.
Giingon nga kagahapon usab gibisita ni PNP Chief General Ronald “Bato” Dela Rosa ang haya ni Arpon.
Dugang ni Petiluna nga sige na sila og dawat og hulga sa mga rebelde sa ilang estasyon diin base sa intelligence report, usa ang ilang estasyon mismo nga sudlon sa NPA.
Nagtuo ang kapulisan ug kasundalohan nga hiniusa nga pwersa sa Central Negros Front ug Regional Strike Force ang maong pagpang-ambush.
Sa nanggawas nga taho, gibutyag sa commander sa 79th Infantry Battalion, Lt. Col. Rederick Garcia, nga ang maong pagpangatake niadtong Biyernes, dugay na nga plano sa NPA.
Samtang ang Central Command sa ilang bahin, andam sa bisan unsa nga hulga subay sa maong pagpang-ambush sa Region 18.
Nagpadala na usab og usa ka army battalion gikan sa Panay ngadto sa Western Mindanao Command (Wesmincom) human sa direktiba sa AFP headquarters.
Matod sa tigpamaba sa CentCom nga si Col. Medel Aguilar nga aduna’y Task Group Cebu ang AFP diin responsable sa seguridad lukop lalawigan sa Sugbo ug sa ubang sakop sa Central Visayas.
Dugang ni Aguilar nga malaumon sila sa kooperasyon sa publiko kabahin niining pwersa sa rebelde kon aduna sila’y mamatikdan, maayo nga i-report sa mga awtoridad.
Gibutyag usab niini sa tigbalita kagahapon, nga aduna’y hulga nga nadawat ang ilang intel apan mga unverified kini ug negative usab atol sa ilang pag follow-up.
Gipaneguro ni Aguilar ang publiko nga anaa ra sila aron malikayan ang pag-ulbo sa kagubot ug ang pagpanalipod sa mga tawo. (HBL)