KAPIN sa 100,000 ka partisipante ang mosalmot sa “Run 2 Plant for Future Generation” karong umaabot June 27, Sabado diin ipahigayon ang sentro sa kalihukan sa Jaclupan watershed sa dakbayan sa Talisay.

Karong tuiga, anaay 44 ka mga lungsod ug unom ka mga siyudad sa Sugbo ang naglakip sa mga mosalmot sa pagpananom gikan sa nagkadaiyang mga lugar.

Nimando na ang gobernador sa probinsiya sa Sugbo nga si Hilario Davide III nga dunganon ang tinuig nga kalihukan sa nagkadaiyang parti kun local government unit sa probinsiya sa Sugbo.

Pinaagi sa Executive Order No. 7, nakigtambayayong ang probinsiya sa Ramon Aboitiz Foundation Inc., ug sa Department of Environment and Natural Resources (DENR) alang sa mga aktibidad sa kaalam sa disaster risk reduction ug climate change adaptation.

Ang buwan usab sa Hunyo mao ang Philippine Environment Month ug World Environment Day ubos usab sa Presidential Proclamation No. 237.

Liboan usab ka mga partisipante ang mosalmot sa maong kalihukan gikan sa Talisay City Government, Provincial Government, Metro Cebu Water District, Department of Education, Philippine Navy, National Labor Relations Commission ug mga barangay nga Jaclupan, Lagtang, Bulacao ug Toong.

Magsugod ang maong kalihukan sa alas 5:00 sa buntag diin lakip nga mosalmot ang 100,000 ka mga tinun-an gikan sa 1,000 ka mga pampubliko nga tunghaan sa elementarya ug sekondarya.

Ang Rafi sa ilang bahin nakig-abag sab sa DENR alang sa ilang National Greening Program (NGP) gikan niadtong 2011.

Ang Run 2 Plant 4 GREENIN Philippines sa Rafi usa ka programa sa fun run ug pagpananom aron mahatagan og kahigayunan ang matag Pinoy nga makasalmot sa sa pagpakgang sa nag-kausab nga klima.