NATAGAK ang Kagay-anong si Francis Casey Alcantara sa quarterfinal round atol sa US$ 25,000 F13 China Futures men’s singles tournament niadtong Biyernes sa China.
Gipilde ang 25-anyos nga Alcantara ni Zhizhe Zhang sa host nga nasod sulod sa duha ka sunod-sunod nga sets.
Naunhan ang Kagay-anon ni Zhang sa unang set agi sa 6-3 nga daug ug natuldokan dayon sa 4-2 human wala na mitiwas si Alcantara pagdula.
Konswelo ni Alcantara, niabot siya sa quarterfinal human giparot niya ang usa pa ka Chinese nga si Zhaoyi Cao sa desisyon nga set.
Naunhan si Alcantara sa unang set sa sikor 6-2, apan nakabangon siya sa ikaduha nga set sa hingpit nga 7-6 (5) aron mapugos sa desisyon nga set.
Sayon ra gisirado ni Alcantara ang dula human miretiro si Cao pagbinat sa Kagay-anon og 3-0 nga labaw.
Gipasigarbo niya ang daug human gitagak ni Alcantara ang second seed nga si Imai Shintaro sa Japan sa iskor 7-5 ug 7-5 atol sa ika-duha nga round.
Moapil pa si Alcantara sa usa pa ka futures tournament sa China.