SECTIONS
philippines
Monday, September 20, 2021

Luzano: Maikadua a SONA... Nabagas!

AWAN duadua….nabagas ti maikadua nga State of the Nation Address (SONA) ni Pres. Duterte ita nga aldaw. Ngamin iti uneg laeng iti nakatawen, adun dagiti nagappuananna a mayannurot kadagiti inkarina a programa sakbay a nagtugaw idiay Malakanyang. Inyunana a binasnotan ti parikut iti illegal a droga. Adu ti naaresto, nakasuan, naikulong, na-rehab, ken napapatay. Naibutaktak iti sangalubongan ti kinapudno a nakaro gayamen ti parikut iti droga ditoy pagilian. Saan a nasirip dagiti naglabas nga administrasyon. Ngem naalibtak dagiti mannirip iti Duterte Administration. Agasem ket nagngangato gayam nga opisyal ti gobyerno ti karaman dita. Sinuyod ni Digong manipud kasulinekan a barangay agingga iti opisina dagiti agtuturay. Adda pay dagiti heneral a nairaman. Kuna ti kaadduan: dayta ah ti trabaho! Trabaho ti ima, saan a saka. Awan pabpaboranna. Napunas ti kapet. Kasta ti trabaho. Nia pay ti makunam, pards? Ala, intay man binsabinsaen dagiti napapateg a nagappuanan ti Duterte Administration:

-o0o-

Kas nangrugiantayon, rinibu gayam dagiti kinnanen ti bisyo gapu iti illegal a droga. Nagbalinen a negosyo iti amin a paset ti kagimongan. Rinibu nga adik (user, pusher) ti pinarukma ti Oplan Tokhang. Masiguro nga adu pay dagiti nakalemmeng. Adda dagiti drug lords a naituang. Adda pay dagiti nabatbati a masipsiputan. Ti imasna…uray gayam nakakulongen dagiti Lords idiay Bilibid…grabe pay laeng ti negosyoda iti illegal a droga. Pinuntirya ni Digong dagiti Lords. Naibutaktak ti aramidda a nakairamanan pay ti maysa a senador (nakakulongen). Saan nga immatras ti linteg nupay adu dagiti bimmato iti negatibo a komento. Uray iti pannakaipatli dagiti karaman iti droga (gapu ta limmabanda) adda latta dagiti imbarbarsakda a pammabasol iti gobyerno. Ngem ad-adu nga amang iti sosyodad ti napnek ken nagyaman iti oplan a naipakat tapno maruros ti illegal a droga iti kagimongan. Kinapudnona, iti kinaadu dagiti naaresto gapu iti Oplan Tokhang, arig nakurang dagiti pagbaludan. Imbag laketdin ta adda dagiti timmultulong iti pannakaipasdek dagiti Rehab centers pakairamanan ti China ken dadduma pay a gangannaet a pagilian.

-o0o-

No panggep iti korapsiyon…dinalapus ti programa ni Pres. Duterte amin nga opisina ti gobyerno…nangruna dagiti ahensiya a karaman iti listaan dagiti most corrupt. Adu dagiti naikkat iti serbisyo ken akem karamanen dagiti nagtalkanna nga appointees. Saan a nakalisi dagiti kotongero. Nadusada. No malagipyo, adda pay nakuna idi ni Pres. Duterte: “sa mga tao sa airport, kung may manghihingi sa inyo ng pera, samapalin niyo!” Adda ngamin dagiti kannawidan (kano) a kotongan kadagiti sumangsangpet a kailiantayo. Naaktuan a sigida dagita nga aramid a mabalin a nabayagen a mapaspasamak kadagiti naglabas a rehime. Isu a naipasdek ti action line 8888 tapno maiyammo a sigida dagiti an-anek-eken dagiti umili ket dagus a maaksiyonan. Inikkatna iti takem dagiti rinuker. Impatugawna dagiti ammona a mapagtalkan. Aramid ti pakakitaan, saan aya, pards? Bay-antayo ti panagtabtabbaawna. Kinataonan dayta. Kadidilanan, kunada. Ti napateg, agtrabtrabaho ti presidente, saan a sadut.

-o0o-

Idi nasirip ni Digong ti plano dagiti terorista a manggulo dita Mindanao, nangruna iti Marawi…inunaannan. Nagdeklara a sigida ni Digong iti Martial Law nupay adda idi daytoy idiay Russia. Saan a nagpangaddua agsipud ta kasapulan. ‘Nia ti napasamak? Agpapan ita, manarimaan pay laeng ti gubat sadiay. Nasuroken iti uppat a gasut a terorista ti napapatay. Adu pay dagiti lumablaban agpapan kadagitoy a tiempo. Agsangagasut metten dagiti natay iti tropa ti gobyerno ken nasuroken iti uppatapulo dagiti naipatli a sibilyan. Gapu ta nagleppasen ti 60-aldaw a termino ti deklarasyon ti martial law…inyamang ni Digong ti isyu ti ekstensiyon sadiay Kongreso. Iti pannakaisursurat daytoy nga espasyo, dipay masierto no aprubado ti aginggat Dec. 31, 2017 a kiddaw ni Digong a pannakaitultuloyna koma tapno naan-anay a masolbar ti parikut iti intero a Mindanao no siguridad ti saritaan. No koma sibibiag pay daydi lolok…siento porsiyento…agbuluntaryo. A makigubat idiay Marawi? Saan…mapan makipangan. Sika met pards..iti dayta a kalakayna, makabaklay pay aya met iti machine gun nga armas dagiti Maute? Palsuot laengen, nalaglag-an. Arasaas: iti tengnga ti gubatan…adda pay la ngata agkubkubra iti taya ti weting? Susmaryusep, talnaka amangan ta matnaganka iti mortar.

-o0o-

Iti kinaadu dagiti kumanunong iti napasamak idiay Marawi (tapno mapulbosen kano dagiti Maute-ISIS) adu met latta dagiti kontrabida. Ti ngarud alsemna…no sinno pay dagiti saan a taga-Mindanao, isuda kano ti ngakngak a ngakngak. He he…siempre, dakkel nga isyu ti Marawi ken Martial Law. Kayatda ti makisawsaw bareng kano ta sumikatda. Sabagay, asidegen ti 2019 Election. Hayy biag. No pudno a dakkel ti nagkurangan ken nagbiddutan ni Digong iti indeklrana a Martial Law dita Mindanao….nababtuog koman ti approval ken trust ratings-na, saan aya? Kitaentayo ti nakaudian a survey ti Pulse Asia idi June 24-29: manipud 76% a trust ratingna, ngimmato iti 81%; idinto ta ti 78% nga approval ratingna ket ngimmato iti 82%. Kaawatan nga ad-adu nga amang ti kumanunong iti ar-aramiden ita ni Pres. Duterte kumpara kadagiti kontra. Tsk tsk…adu ngamin dagiti nangalawngaw, awan met ngarud maitulongda para iti solusyon ti terorismo idiay lumaud.

-o0o-

Itay nabiit, adda imbutaktak ni PNP Chief Gen. Bato Dela Rosa: i-sabotahe kano dagiti puwersa ti NPA ti SONA babaen iti aramidenda (kano) a panggulo idiay deppaar ti Davao. Kasla pimmudnon sa ti intel-report ta ngamin idi laeng kanikauda, lima a kameng ti PSG – Presidential Security Group a nangaramid iti administrative movement idiay Brgy. Katipunan, Arakan, North Cotabato (asideg iti Davao) ti nasugatan iti ambush nga insayangkat dagiti kameng ti NPA. Dayta ti gapuna no apay a nasidir manen ti panagtepteppel ni Duterte. Tinapikna dagiti opisyales ti government peace panel a maisardeng pay laeng koma ti peace negotiation iti gobyerno iti National Democratic Front (NDF) no dida sardengan ti panagatakeda kadagiti tropa ti gobyerno. Adda met ketdi puntona. Ngem kuna dagiti analyst: masapul koma a matuloy ti peace negotiation (5th round) tapno mairingpasen dagiti parikut iti baet ti goberyerno ken CPP-NDF-NPA.

-o0o-

Matagiuray iti pakabuklan ti SONA ti presidente dagiti adu pay a nagappuanan ti Duterte Administration iti nakatawen kasta met dagiti planona para iti masakbayan. Mabalin a madaplisanna ti tensiyonda kenni Ombudsman Morales gapu iti nalap-it kano a kaso nga isaklangda kontra Ex-Pres. P-noy Aquino. Kuna ngarud ti VACC (Volunteers against Crime and Corruption)…ti rumbeng koma a kaso ni P-Noy ket Reckless Imprudence resulting to Multiple Homicide a saan ketdi a Graft ken Usurpation of Authority. Ala, urayentayo laengen ti sibubukel a mensahe ti maikadua a SONA sakbay nga intay agkumento. Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph