IPAHIGAYON sa kagamhanan sa dakbayan sa Sugbo ang bidding sa 45.2 ektaryas nga luna sa South Road Properties (SRP) karong Hunyo 30 human sa pre-bidding conference niadtong Huwebes.
Ang maong luna ilugan sa upat ka dagkong land developer sa nasod sama sa Filinvest Land Inc., Robinsons Land Corp. Ayala Land –Ce.bu Holdings Incorporated ug SM Prime Holdings Inc. (SMPHI)
Ang mga developer pulos interesado nga mopalit ug mopalambo sa maong luna apan silang tanan gustong mapapas ang kondisyon sa konseho sa dakbayan nga kinahanglang magtukod og arena ang winning bidder gumikan kay aduna nay arena ang SMPHI duol sa luna nga ilang giilugan.
Apan si Mayor Michael Rama kinsa gihatagan og katungod sa konseho sa pagpangita og buyer sa maong luna niingon nga angay sundon kon unsay nabutang nga kondisyon sa resolusyon nga gipasar sa city council.
“I’ve been telling them, take it or leave it mana siya,” matod sa mayor.
Siya niingon nga kon unsay nalatid nga nasabutan sa konseho, angay kini nga sundon.
Ang konseho nipadayag sa ilang kaandam pag-usab sa kondisyon kon gikinahanglan.
Ang mayor nagkanayon nga kon usbon ang kondisyon mao sab ang panahon sa pag-bidding, mahisama kini sa duwa nga basketball nga usbon ang rules samtang nagpadayon ang duwa.