SIYAM ka oras nga power interruption ang masinati sa pipila ka bahin sa amihanang Sugbo karong adlawa.

Gipahibawo sa National Grid Corporation of the Philippines (NGCP) nga mahitabo ang power interruption sugod alas 8 sa buntag hangtod na sa alas 5 sa hapon.

Ang mga dapit nga maapektuhan kadtong mga giserbisyuhan sa Cebu Electric Cooperative kun CEBECO II.

Lakip sa franchise area sa Cebeco II ang Danao City, Bogo City, Borbon, Carmen, Catmon, Compostela, Daanbantayan, Medellin, San Remegio, Sogod, Tabogon, Tabuelan ug Tuburan.

Sigun sa NGCP, tinguha sa maong power interruption ang pagpatuman sa preventive maintenance sa 69-kilovolt nga Compostela-Medellin line ingon man alang sa simulation sa auto-recloser niini.